Astanada «Shattyq» balalar shyǵarmashylyǵy festıvali ótip jatyr
ASTANA. QazAqparat - Elorda kúnine arnalǵan jyl saıynǵy «Shattyq» halyqaralyq balalar shyǵarmashylyǵy festıvalinde 600 bala baǵyn synaıdy, sonyń ishinde 100 astamy - Astanadan.
Astanalyq saıabaqta ótip jatqan shara barysynda Qazaqstannyń barlyq óńirlerinen, sondaı-aq Armenııa, Bolgarııa, Germanııa, Grýzııa, Italııa, Qytaı, Reseı, Túrkııa jáne t.b. memleketterden kelgen jas daryndar bas qosady. Qatysýshylar vokaldyq, horeografııalyq, ınstrýmentaldy, erekshe janrlarda jáne «Sán teatry» nomınatsııasynda sheberlik baıqasady, dep habarlaıdy astana.kz.
- Festıval aıasynda árbir komanda qazylar alqasynyń nazaryna 30 mınýttyq baǵdarlama usynady, jeńimpazdar alty atalym boıynsha anyqtalady. Festıvaldi jyl saıyn ótkizý dástúrge aınalǵan, oǵan jyl saıyn júzdegen bala qatysady, - deıdi jobanyń avtory jáne uıymdastyrýshy Qarlyǵash Ábdikárimova.
Jas ártisterdiń ónerin óner áleminiń belgili qaıratkerleri - kompozıtorlar, ánshiler, horeograftar baǵalaıtyn bolady. Ádil qazylar alqasynyń tóraǵasy - KSRO halyq ártisi, Memlekettik syılyqtyń laýreaty Bıbigúl Tólegenova.
«Shattyq» halyqaralyq balalar shyǵarmashylyǵy festıvali osy jyldary elimizdiń mádenı ómirinde óz ornyn taba aldy. «Shattyq» laýreaty ataǵy jas daryndardyń shyǵarmashylyqtaǵy jolyn ashady.
