Astanada «Shattyq-2015» balalar baıqaýynyń jeńimpazdary anyqtaldy
ASTANA. QazAqparat - Astanada oqýshylar arasynda ótken «Shattyq-2015» óner baıqaýynyń shymyldyǵy gala-kontsertpen aıaqtaldy.
Jyl saıyn túrli óner túrleri boıynsha myńdaǵan jas ónerpazdardyń jolyn ashyp, tanymaldylyqqa bastaıtyn baıqaýǵa bıyl 6 myńǵa tarta oqýshy qatysty. Daryndy jastar eki jas sanaty: 10 -15 jas jáne 16-20 jas ereksheligi boıynsha baq synady. Olar on úsh nomınatsııa boıynsha jeti janrda synǵa túsken bolatyn. Atap aıtsaq, oqýshylar aspapty solo, halyq aspaptary, aspapty ansambl, hor áni, estrada áni, halyq áni (solo, ansambl), halyq bıi, qazirgi zaman bıi, baldyq bı, fotosýret, beıneleý óneri, poezııa, dramalyq teatr degen nomınatsııalarda ónerlerin pash etti.
Balǵyn ónerpazdar 5 kún boıy elordanyń túrli sahnalarynda 28 altyn, 40 kúmis jáne 56 qola medaldi sarapqa saldy. Sonymen qatar ustazdarǵa 250 dıplom men 124 sertıfıkat tapsyryldy.
Baıqaý jeńimpazdaryn Astana ákiminiń orynbasary Ermek Amanshaev pen Bilim basqarmasynyń basshysy Elmıra Sýhanberdıeva marapattap, baǵaly syılyqtar tabystady.
«Kelesi jyly «Shattyq» baıqaýynyń on jyldyǵyn toılaımyz. Óner ıeleriniń merekesine aınalyp úlgergen osynaý keremet baıqaýdy jyl saıyn ótkizý jaqsy dástúrge aınaldy», - deıdi astana ákiminiń orynbasary Ermek Amanshaev.
E.Sýhanberdıevanyń aıtýynsha, dástúrli qalalyq baıqaý mektep, lıtseı, gımnazııa, tehnıkalyq kásibıuıym oqýshylarynyń arasynda Delfıı oıyndarynyń baǵdarlamasy negizinde ótkiziledi.
«Balalardyń ónerlik jáne shyǵarmashylyq deńgeıin atalmysh baıqaýdyń qorytyndylary tolyq kórsetip otyr»,- deıdi E.Sýhanberdıeva.
Sonymen, «Poezııa» atalymynda elordalyq oqýshylar Abaı Bákir men Janar Nurǵazına, «Halyq bıi» atalymynda «Saryarqa» jáne «Gúlnár» bı ansamblderi, «Qazirgi zaman bı»» atalymynda «Aq shaǵala» ujymy men №48 mektep-lıtseıiniń oqýshylary jeńimpaz dep tanyldy.
