Astanada «Sharyqtaǵan Ońtústiktiń ánderi-aı» atty kontsert ótti
ASTANA. QazAqparat - Astanadaǵy «Etnoaýyl» ulttyq mádenı kesheninde «Sharyqtaǵan Ońtústiktiń ánderi-aı» atty kontsert ótti, dep habarlaıdy QazAqparat.
«EKSPO-2017» halyqaralyq mamandandyrylǵan kórmesi aıasynda ótip jatqan keshte Astana turǵyndary men qonaqtaryna Sh.Qaldaıaqov atyndaǵy oblystyq fılarmonııanyń ónerpazdary án men bıden shashý shashty.
«119 óner adamynan quralǵan bizdiń óner ujymy Astana qalasyndaǵy EKSPO kórmesine keldik. 29 tamyzdan bastap Astananyń ár jerlerinde kontserttik baǵdarlamalar ótýde. Búgin munda estradalyq baǵyttaǵy úlken kontsert bolyp jatyr. Ózderińiz kórip otyrsyzdar, halyq erekshe qarsy alyp, ystyq yqylasyn bildirip, toıda júrgendeı bizben birge bılep, kóńilderin kóterip jatyr. Osyndaı múmkindikter syılap otyrǵan Elbasymyzǵa, Ońtústik Qazaqstan oblystyq ákimdigine úlken alǵysymyzdy bildiremiz», deıdi Sh.Qaldaıaqov atyndaǵy oblystyq fılarmonııasy bas dırektorynyń shyǵarmashylyq jónindegi orynbasary Álimjan Raýshanbekuly.
Aıta keteıik, Ońtústik Qazaqstan oblysynyń Astana qalasyndaǵy kúnderi aıasynda aýqymdy is-sharalar ótip jatyr.
Atap aıtqanda, 29 tamyz ben 3 qyrkúıek aralyǵynda salt-dástúrdi, ádet-ǵurypty, óner men shyǵarmashylyqty pash etetin 10-nan astam shara elordalyqtar men qala qonaqtarynyń nazaryna usynylatyn bolady. Bes kúnge sozalatyn dúbirli toıda ońtústikqazaqstandyq óner maıtalmandary «Túrki eliniń túp tamyry - Ońtústikten mereıli Astanaǵa sálem!» óner kerýeni, «Sálem Astana! Sálem, EKSPO!», «Ońtústik ázilderi» shoý-kontsertterin usynsa, óńirdiń tarıhı qundylyǵy men erekshe mádenı kelbetin dáripteıtin kórnekti jádigerlerdiń kórmesi men tarıhtan syr shertetin sýretshiler men qolónershiler buıymdarynyń kórmeleri ótkiziledi.
29-31 tamyz aralyǵynda «Beıbitshilik jáne kelisim» saraıynda ótetin kórmege óńirimizdiń tamaq jáne jeńil ónerkásip, mashına jasaý, farmatsevtıka jáne qurylys zattary salalarynyń 50-den astam kásiporyndary qatysady.
Sondaı-aq, 30 tamyz kúni saǵat 11.00-de Astana qalasynyń oqýshylar saraıynda «Kúsh atasy - Qajymuqan» anımatsııalyq fılminiń tusaýkeseri ótse, 31 tamyz kúni «Otyrar dastany», «Qazaqstan barysy», «Tolaǵaı», «Qazaqstan brendi» anımatsııalyq fılmderin Astana jurtshylyǵy tamashalaıdy. Al 2-3 qyrkúıek kúnderi agrarly aımaqtyń aýyl sharýashylyq jármeńkesi uıymdastyrylady. Jármeńkege naryq baǵasynan arzan quny 265 mln. teńge bolatyn 550 tonnaǵa jýyq ónim shyǵarylady. Munan bólek, respýblıka boıynsha shaǵyn jáne orta kásipkerlik sýbektileriniń sany jaǵynan kósh bastaıtyn Ońtústiktiń ónerkásip taýarlarynyń kórmesi ótedi.
Demalys kúnderi «Qazanat» ıppodromynda aýdaryspaq, qyz qýý, jamby atý, teńge ilý, qusbegilik ónerleri kórsetiletin bolsa, 3 qyrkúıek kúni «Etnoaýylda» qazaq kúresi, asyq atý, toǵyzqumalaq jáne kórermender arasynda «Qoshqar kóterý» saıysy uıymdastyrylady.
3 qyrkúıek kúni saǵat 21.30-da EKSPO alańyndaǵy Amfıteatrda Ońtústikten shyqqan qazaq estradasynyń juldyzdary Nurlan Ónerbaev, Qaırat Nurtas, Altynaı Jorabaeva, Jubanysh Jeksenuly jáne taǵy basqa da kóptegen óner maıtalmandary óner kórsetetin «Án men kúı áldıleıdi Astanany!» atty qorytyndy Gala-kontserti ótedi.
