Astanada sharýa qojalyǵynan 30 mln teńge qaryz alyp qashyp júrgen adamdy polıtsııa ShQO-dan tapty

ÓSKEMEN. QazAqparat – Shyǵys Qazaqstan oblysynyń polıtseıleri Astanada 30 mln teńge qaryz alyp qashyp júrgen adamdy tapty, dep habarlaıdy QazAqparat tilshisi.

ShQO polıtsııa departamenti baspasóz qyzmetiniń málimetine súıensek, polıtsııa qyzmetkerleri iri kólemde aqsha qaıtarmaı júrgen boryshkerdi tapty.

«Tártip saqshylaryna jeke sot oryndaýshysynan Astana qalasyndaǵy sharýa qojalyǵynyń ıesinen shamamen 30 mıllıon teńge qaryz alyp qaıtarmaı qoıǵan 52 jastaǵy adamǵa izdestirý jarııalaý týraly qaýly kelip tústi. Polıtsııa jedel sharalar qabyldap, bir táýlik ishinde boryshkerdiń qaıda júrgenin anyqtady. Ol Shyǵys Qazaqstan oblysy Ulan aýdanynyń aýmaǵynan tabyldy», - delingen aqparatta.

Qazirgi ýaqytta málimetter bereshekti óndirip alý boıynsha sharalar qabyldaý úshin ýákiletti organǵa berildi.

Aıta keteıik, jyl basynan beri oblys polıtseıleri 20-dan astam boryshkerdi anyqtaǵan.