Astanada Shara Jıenqulova atyndaǵy qalalyq bı festıvali ótýde
ASTANA. Mamyrdyń 3-i. QazAqparat /Jasulan Amanbaıuly/ - Qazaqstan halqynyń birligi merekesi aıasynda Astananyń Ortalyq alańynda Shara Jıenqulova atyndaǵy qalalyq bı festıvali ótýde, dep habarlaıdy QazAqparat.
Qalalyq deńgeıde ótip jatqan sharaǵa 28-ge tarta kásibı jáne áýesqoı ujymdar qatysýda.
Qalalyq Mádenıet basqarmasynyń bastyǵy Erkebulan Aǵymbaevtyń aıtýynsha, festıval qazaq jáne elimizdegi basqa da etnostardyń ulttyq bı ónerin nasıhattaý, kásibı tájirıbe almasý, pedagog bıshiler men baletmeısterler arasyndaǵy ǵylymı áleýetti arttyrý maqsatyn kózdeıdi. «Munda óner jolyna jańa túsip kele jatqan ujymdar jáne kásibı bı toptary óner kórsetýde. Sonyń ishinde memlekettik bı teatrynyń «Naz», «Terra» jáne «Shalqyma» syndy ansamblderi bar. Festıvaldiń eń úlken qatysýshysy - 25 jasta bolsa, eń kishkentaıy - 3 jasta», deıdi E. Aǵymbaev.
Festıvalde barlyq janrlar: ulttyq, klassıkalyq jáne qazirgi zamanǵy bıler oryndalýda. Shara Jıenqulova atyndaǵy qalalyq bı festıvali Astana ákimdigimen jáne qalalyq Mádenıet basqarmasymen uıymdastyryldy.
