Astanada shańǵy-rollerden alǵash ret Ashyq kýbok ótedi
ASTANA. 3 tamyz. QazAqparat - 4 tamyzda Qazaqstannyń elordasynda shańǵy-rollerden tarıhymyzdaǵy tuńǵysh Ashyq kýbok ótedi. Bul týraly astana.kz saıtyna shańǵy jarysy federatsııasynyń baspasóz qyzmetinen habarlady.
Dodaǵa Olımpıada oıyndary-2014 sportshylary, Qazaqstannyń úzdik shańǵyshylary, sonyń ishinde Álem chempıonatynyń júldegerleri Alekseı Poltoranın men Nıkolaı Chebotko, komandalyq sprıntten Álem kýbogy kezeńiniń jeńimpazy Denıs Volotka, jastar arasyndaǵy Álem chempıonatynyń júldegeri Mark Starostın jáne t.b. qatysady.
«Bizdiń pikirimizshe, chempıondardyń jaqyn aralasýy jastarymyzdy jańa sporttyq jetistikterge jeteleıdi. Mundaı jappaı is-sharalardy ótkizý qoǵamdy, ásirese jastardy salaýatty ómir saltyna jáne sportqa tartady!»,- deıdi uıymdastyrýshylar.
Týrnırge qatysýǵa sportqa áýes qyz-jigitter, erler men áıelder, ardagerler shaqyrylady. Astananyń Ashyq Kýbogy Qalalyq shańǵy-rollerlik trassada (ortalyq park) ótedi. Jarys aıaqtalǵan soń kelýshilerge sportshylarmen jáne ulttyq quramamen sýretke túsýge, avtograftar alýǵa múmkindik beriledi.
Uıymdastyrýshylardyń habarlaýynsha, qazirgi ýaqytta Poltoranın men Chebotkoǵa basty úmit artylyp otyr. Olar Sochıde ótetin qysqy Olımpıadada bas júldege qol jetkizedi dep kútilýde. Sonymen qatar, qurama komanda sapynda nazar aýdararlyq basqa da sportshylar bar. Búgingi tańda Qazaqstan quramasy atalmysh sport túrinen 9 lıtsenzııaǵa ıe boldy. Jyl sońyna deıin bul kórsetkishti 12-ge deıin arttyrý josparlanǵan.
