Astanada shańǵy maýsymy ashyldy
ASTANA. 23 jeltoqsan. QazAqparat - Elordada shańǵy rollerlik trassada qysqy shańǵy maýsymynyń saltanatty ashylý rásimi ótti. Alǵashqy resmı jarysqa 300 astam adam qatysty. Bul týraly astana.kz saıtyna qalalyq Týrızm, dene shynyqtyrý jáne sport basqarmasynan habarlady.
Áýesqoılar men kásibı sportshylar qatysqan jarysqa kelgenderdiń bárine shańǵy berildi. 2000 jyly týǵan jáne odan kishi balalar arasyndaǵy jarysta uldar arasynda Petr Sıverın basym tússe, qyzdar arasynda Arına Shýlıak 1 shaqyrymda kósh bastady. 5 km jarysta 1998-1999 jyldary týǵandar arasynda Vladımır Chervonnyı márege birinshi bolyp jetti, osy jas sanatynda Darıa Lıýdvıg 3 km jarysta úzdik atandy. Sonymen qatar, 1996-1997 jj týǵandar arasynda Rýstam Kóperbaev jeńiske jetti, al Rýstam Amanjolov ekinshi oryn aldy. Aıǵanym Jumaǵulova qyzdar arasynda 3 shaqyrymda basymdyq tanytty.
1994-1995 jyly týǵandar jáne odan úlkender arasyndaǵy Erasyl Tasbolatov kósh bastady. Artem Aslamov pen Rýslan Qojaev ekinshi jáne úshinshi oryndarǵa turaqtady.
Dástúr boıynsha buqaralyq jarysqa qatysatyn ardagerler de tys qalǵan joq. Leonıd Antonov pen Svetlana Imanǵajına óte jaqsy nátıje kórsetti.
Aıta keteıik, ótken shańǵy maýsymynda ótken jarystarǵa 5 myńnan astam elorda turǵyny qatysqan bolatyn. Jyl saıyn belsendi demalatyn astanalyqtardyń sany artyp keledi, sondaı-aq, qalada bul úshin qolaıly jaǵdaılar jasalýda.
Elorda turǵyndary men qonaqtary shańǵy rollerlik trassaǵa kúnde saǵat 10.00-20.00 bara alady.
