Astanada Shámshiniń ánderi qala keńistiginde jańasha únmen áýeledi
ASTANA.KAZINFORM — Astanada kórnekti kompozıtor Shámshi Qaldaıaqovtyń shyǵarmashylyǵyna arnalǵan erekshe mýzykalyq performans ótti. Kompozıtordyń týǵan kúnine oraı Astana qalasy ákimdiginiń Mýzykalyq jas kórermender teatrynyń ártisteri kópshilikke keńinen tanymal ánderin qala keńistiginde oryndap, kórermenge tartý etti. Bul týraly Astana qalasynyń ákimdigi málim jazdy.
Performans barysynda jas ónerpazdar kompozıtordyń «Arys jaǵasynda», «Saǵynyshym meniń», «Baqyt qushaǵynda», «Ana týraly jyr», «Qushaq jaıǵan qandaı adam», «Jan qurbym» jáne «Qaıyqta» syndy tanymal shyǵarmalaryn oryndady.
Mýzykalyq qoıylymnyń ereksheligi — onyń qala keńistiginde uıymdastyrylýynda.
Ónerpazdar Shámshi Qaldaıaqovtyń shyǵarmalary oryndalatyn pıanıno ınstallıatsııasynyń janyna jaıǵasyp, óner kórsetti.
Osylaısha, ádettegi sahnalyq qoıylymnan tys formatta uıymdastyrylǵan performans mýzyka men elorda turǵyndaryn jáne qonaqtaryn bir arnaǵa toǵystyrdy.
Bul jas ónerpazdarǵa Shámshi Qaldaıaqovtyń shyǵarmashylyǵyn búgingi kórermenge jańasha tanytyp, kompozıtordyń mol murasyn zamanaýı formatta jetkizýge múmkindik berdi.
— Shámshiniń ánderi urpaqty uıystyrady. Onyń ánderin ár jastaǵy adam biledi, súıip tyńdaıdy. Biz úshin bul shyǵarmalardyń sahnadan ǵana emes, qala keńistiginde de shyrqalyp, Astananyń kúndelikti tynys-tirshiliginiń bir bólshegine aınalýy mańyzdy, — dedi Mýzykalyq jas kórermender teatrynyń dırektory Ashat Maemırov.
Sonymen qatar elordadaǵy mýzykalyq qoıylymdar birneshe alańda — «Báıterek» monýmenti mańynda jáne Arbatta uıymdastyryldy.
Aıta keteıik, búgin qazaq valsiniń koroli Shámshi Qaldaıaqovtyń týǵanyna 96 jyl toldy.
