Astanada shaqsa adam óltiretin masa paıda boldy

Ázirshe, qaýipti qansorǵysh qala irgesindegi aýyldarda bas kótere bastaǵan. Endi ortalyqqa qaraı yǵysyp keledi. Epıdemıologtar bolsa shuǵyl qamdanyp, qaterdiń aldyn-alýǵa kiristi. Jándikter kóbeıýi múmkin degen jerlerdi qazir jappaı ýlap jatyr.

Bóshkelerge quıylǵan sýǵa SES qyzmetkerleri ý aralastyryp jatyr. Óıtkeni, masalardy osy ýly qospamen ǵana kózin joıýǵa bolady. Sóıtip kóktem shyǵa elordadaǵy zııankesterdiń sanyn azaıtýǵa jantalasyp jatyr. Onyń ózinde qas qaraıǵan shaqta. Alaıda, jurtty «keselden qorǵaımyz» dep júrgen jandardy túsinbeı júrgender kóp.

SES qansha álek bolǵanymen jándikterdiń qaýipti túrleri de paıda bolyp jatyr. Bul joly «Anofles» dep atalatyn masa bas kótere bastapty. Qaýipti qansorǵysh elorda irgesin jaýlap alǵan. Endi ortalyqqa jappaı aǵylýy ǵajap emes. Eń qorqynyshtysy, jándikke talanǵan adam ólip ketýi múmkin. Bolmasa bezgek aýrýyn juqtyrýy yqtımal.

«Astana qalasynda «Anofles» masasynyń paıda bolý túri bar. Óıtkeni, onyń paıda bolýyna qolaıly jaǵdaı bolyp otyr. Bul bizde Mıchýrın kentinde 2013-te tabyldy, birinshi oshaǵy. Ekinshi oshaǵy jaqynda Alash tas jolynda ekinshi oryndy taýyp otyr», - dep málimdedi Astana qalalyq SEQB bas mamany Aıbarsha Dúısenbaı.

Sondyqtan qansorǵyshpen kúres kúsheıtilip otyr. Onyń qalaǵa jaıylmasy úshin batpaqty jerler, ózen kólder ǵana emes, turǵyn úılerdiń jertólelerine ý sebilýde. Al qansorǵyshtardan qorǵaný úshin esik-terezeni qymtap otyrǵan jón.

«Bıyl, sınoptıkterdiń boljamynsha, elimizde jaýyn-shashyn mol bolady. Bul turǵynar úshin qaýipti. Sebebi jańbyrdan keıin masalarǵa jan bitip belsendilikteri arta túsedi eken. Al masalar bas qalany basyp almasy úshin SES qyzmetkerleri 24 táýlik boıy udaıy kezekshilik uıymdastyrmaq», - dedi bas maman.