Astanada shahmattan Senat Open týrnıriniń shırek fınaly ótedi
ASTANA. KAZINFORM — Astanada Senat Open 2026 respýblıkalyq shahmat týrnıriniń ¼ fınaly ótedi. Týrnırdiń ashylý saltanaty 12 sáýir kúni saǵat 10:00–de L. N. Gýmılev atyndaǵy Eýrazııa ulttyq ýnıversıtetinde bastalady, dep habarlaıdy elorda ákimdiginiń resmı saıty.
Atalǵan joba — QR Parlamenti Senatynyń qoldaýymen úshinshi jyl qatarynan uıymdastyrylyp kele jatqan aýqymdy respýblıkalyq bastama.
Týrnır ıdeıasy QR Parlamenti Senatynyń Tóraǵasy Máýlen Áshimbaevtyń bastamasymen júzege asyrylyp, Qazaqstan shahmat federatsııasynyń prezıdenti Tımýr Týrlovtyń qoldaýyna ıe boldy.
Jobanyń negizgi maqsaty — shahmatty keńinen nasıhattaý, zııatkerlik sportty damytý, ártúrli sala ókilderi arasyndaǵy ózara baılanysty nyǵaıtý jáne salaýatty ómir saltyn qalyptastyrý.
Senat Open ¼ fınalynda 2026 jyldyń 1-28 aqpan aralyǵynda ótken 1/8 kezeń aıasyndaǵy 7 irikteý týrnırinen úzdik qatysýshylar baq synaıdy:
• 7 aqpan — memlekettik qyzmetshiler jáne ulttyq kompanııa qyzmetkerleri arasyndaǵy týrnırdiń 20 úzdigi
• 8 aqpan — ardagerler arasyndaǵy 20 úzdik
• 14 aqpan — bilim salasy qyzmetkerleri arasyndaǵy 20 úzdik
• 15 aqpan — mádenıet jáne óner salasy qyzmetkerleri arasyndaǵy 20 úzdik
• 21 aqpan — densaýlyq saqtaý qyzmetkerleri arasyndaǵy 20 úzdik
• 22 aqpan — buqaralyq aqparat quraldary ókilderi arasyndaǵy 20 úzdik
• 28 aqpan — quqyq qorǵaý jáne kúshtik qurylym qyzmetkerleri arasyndaǵy 20 úzdik
Osylaısha, barlyǵy 140 úzdik oıynshy ¼ fınalda ózara myqtyny anyqtaıdy.
Sonymen qatar, QR Parlamenti Senaty men Qazaqstan shahmat federatsııasy bekitken erejelerge sáıkes, bul kezeńde depýtattar men qoǵamdyq keńes músheleri de qatysady.
Týrnır formaty:
• Júıe: shveıtsarııalyq júıe, 9 týr;
• Ýaqyt baqylaýy: rapıd 10+5.
Týrnır qorytyndysy boıynsha úzdik 35 qatysýshy Senat Open týrnıriniń ½ fınalyna joldama alady. Al jarystyń fınaly 2026 jyldyń 26 maýsymynda Astana qalasynda ótedi.
Osyǵan deıin Astanada tennısten halyqaralyq týrnır ótetinin jazǵan edik.