Astanada «Shahmat álemi» kórmesi ashylady
ASTANA. 7 naýryz. QazAqparat - Elordada 8 naýryz - áıelder merekesi kúni astana qonaqtary elordanyń kórnekti oryndaryn, Qazaqstannyń Tuńǵysh Prezıdentiniń murajaıyn jáne Chempıonatqa oraı arnaıy ashylǵan «Shahmat álemi» kórmesin aralap, tanysady.
Bul týraly QR Shahmat federatsııasynyń baspasóz qyzmeti habarlady.
Shahmattan áıelder arasyndaǵy IV toptyq álem chempıonatynyń qatysýshylary úshin 8 naýryz demalys bolady. Shahmatshy qyzdar, olardyń jattyqtyrýshylary jáne arbıtrlary Astanany aralap, sholý ekskýrsııasyna qatysady, sondaı-aq Memleket basshysy Nursultan Nazarbaevqa ár jyldary ózge memleketterdiń kóshbasshylary, ataqty grossmeısterleri jáne shahmat uıymdary syıǵa tartqan shahmattyń biregeı toptamasymen tanysa alady.
«Shahmat álemi» kórmesi osy Chempıonatqa oraı Qazaqstannyń Tuńǵysh Prezıdenti murajaıynda arnaıy ashylǵan bolatyn. Murajaı ókilderiniń aıtýy boıynsha, qonaqtar oıynǵa arnalyp, farfordan, móldir taza shynydan, metaldardan, onyń ishinde qymbat metaldardan, teriden, tastardan, aǵashtan, eski kezdegi mamonttardyń súıeginen jasalǵan shahmat atrıbýtıkasyn, fıgýralardyń toptamalaryn jáne taqtalaryn baǵalaı alatyn bolady...
