Astanada shaǵyn jáne orta bıznes sýbektileri 8,3 paıyzǵa kóbeıdi

ASTANA. KAZINFORM — Elordada ótken jyly shaǵyn jáne orta bıznes sýbektileri 15,8 trln teńgege taýar óndirip, qyzmet kórsetken.

Salanyń damýy týraly tolyǵyraq Astana qalasynyń ınvestıtsııalar jáne kásipkerlikti damytý basqarmasy basshysynyń orynbasary Qýanysh Saparov aıtyp berdi.

— Búginde elorda aýmaǵynda 254 myń shaǵyn jáne orta bıznes sýbektisi jumys istep tur. Bul ótken jylǵy kezeńmen salystyrǵanda 8,3%-ǵa artqanyn kórsetip otyr. Ótken jyly qala ekonomıkasyndaǵy shaǵyn jáne orta bıznestiń úlesi 68,2% nemese 10 563,8 mlrd teńge, el boıynsha 1 oryndamyz. Shaǵyn jáne orta bızneste 528 myń adam jumys isteıdi, bul qalanyń eńbekke qabiletti halqynyń 73%, — dedi Qýanysh Saparov Astana qalasy kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, elordada ótken jyly shaǵyn jáne orta bıznes sýbektileri 15,8 trln teńgege taýar óndirip, qyzmet kórsetken.

— Bul respýblıka boıynsha óndirilgen ónim men kórsetilgen qyzmettiń 19%. Sonymen qatar byltyr ShOB sýbektileri 1 300,7 mlrd teńge salyq jáne ózge de tólemder jasady. Atalǵan soma jalpy túsimniń 45,9%. Atalǵan kórsetkishterge memlekettik qarjylyq jáne qarjylyq emes qoldaý sharalarynyń arqasynda qol jetti. Jyl basynan beri jergilikti bıýdjetten bızneske qoldaý kórsetý úshin 9 345 mln teńge bólindi, — deıdi ol.

Aıta keteıik, elimizde shaǵyn jáne orta bıznes sýbektilerin jeńildikpen qarjylandyrý baǵdarlamasy ázirlenip jatyr.