Astanada «Shabyt» halyqaralyq festıvali bastaldy
ASTANA. QazAqparat - Osymen 21-shi ret ótkizilip otyrǵan shyǵarmashyl jastardyń festıvaline bıyl 345 úmitker qatysýda, dep habarlaıdy QazAqparat tilshisi.
Atalǵan festıval óner salasyndaǵy aıtýly oqıǵa jáne talantty jastarǵa óz ónerin barshaǵa pash etip, úlken sahnaǵa jol ashatyn biregeı alań.
5-9 qarasha aralyǵynda ótetin óner básekesinde daryndy jastar «Klassıkalyq mýzyka», «Halyq mýzykasy», «Estradalyq vokal», «Horeografııa» jáne «Jýrnalıstıka» nomınatsııalary boıynsha baq synaıdy.
Baıqaýǵa tek qana Astananyń ózinen 163 úmitker qatysýda, odan bólek shetelden Ázerbaıjan, Belarýs, Bashqurtstan, Grýzııa, Izraıl, Qyrǵyzstan, Reseı, Ýkraına jáne Ózbekstan elderiniń ókilderi baq synaýda.
«Ózderińiz biletindeı Elbasy jastar shyǵarmashylyǵynyń júıeli túrde damýyna basa nazar aýdarady. Aldaǵy jyl jastar jyly retinde atalyp ótiletinine oraı, búginde jastarǵa baǵyttalǵan túrli salalar boıynsha keshendi baǵdarlamany ázirleýdemiz. «Shabyt» festıvali elordamyzdyń qurdasy jáne Astanamen birge onyń da shyǵarmashylyq aýqymy keńeıip keledi. Festıval óner salasyndaǵy talaı jandardyń baǵynyń janýyna sebep boldy jáne sol dástúr jalǵasa beredi», - dedi Astana qalasynyń ákiminiń orynbasary Ermek Amanshaev.
Elorda ákimi orynbasarynyń sózine dálel, ár jyldary festıval gran-prıi tanymal ázilkesh Tursynbek Qabatovqa, aqyn Qalqaman Sarınge, balet ártisi Áıgerim Beketaevaǵa, opera ánshisi Aıgúl Nııazovaǵa, «Melomen» tobyna, Asha Mataıǵa, belgili ánshi ári kompozıtor Qaırat Baekenovke jáne basqa da óner juldyzdaryna tabystalǵan bolatyn.
Halyqaralyq óner baıqaýynyń gran-prı ıegerleri men júldeli oryn alǵandar aqshalaı syılyqtarmen jáne «Shabyt» festıvaliniń dıplomdarymen marapattalady. Onyń ishinde, gran-prı - 350 myń teńge, birinshi oryn- 300 myń teńge, ekinshi oryn - 250 myń teńge jáne úshinshi orynǵa - 200 myń teńge beriledi.
Taǵy bir aıta keterligi, «Jýrnalıstıka» nomınatsııasynda qazaq jazýshysy, jýrnalıst Sherhan Murtazanyń qurmetine arnaıy syılyq tabystalady. 
