Astanada «Shabyt» festıvali shymyldyǵyn ashty
ASTANA. 3 qarasha. QazAqparat - Astanada XV halyqaralyq «Shabyt» shyǵarmashyl jastar festıvali bastaldy.
Kongress-holl saraıynda bir juma boıy bas shahardy án men kúıge terbeıtin festıvalde úmitkerler «Klassıkalyq mýzyka», «Jýrnalıstıka», «Beıneleý óneri», «Halyq mýzykasy», «Tsırk óneri», «Balettiń jas ártisteri baıqaýy» jáne «Úzdik ádebı shyǵarma» atalymdary boıynsha ónerlerin synaıdy. Talaı jastardyń keýdesine úmit otyn tutandyryp, shyǵarmashylyǵyna serpilis bergen halyqaralyq «Shabyt » festıvali bıyl on besinshi ret ótýde.
Ol óziniń ǵumyrynda 14 myńǵa tarta shyǵarmashyl jastyń jigerin janyp, jarqyn talanttaryn tanytýlaryna múmkindik berdi, Astanada mádenıet pen óner zııalylarynyń shoǵyryn qalyptastyrdy.
Baıqaýdyń saltanatty ashylý rásimine Astana qalasynyń ákimi Imanǵalı Tasmaǵambetov quttyqtaý hatyn joldady.
«Óner joly qashanda kúrdeli. Tynbas eńbekti, temirdeı tózimdilikti, tabıǵı talant pen týa bitken daryndy talap etedi. Bul rette qashanda bizdiń rýhanııatymyzdyń ólshemi men órisi eń aldymen ónegesi mol, talapty, talantty, shyǵarmashyl jastaryna baılanysty. Óner men rýhanııat salasyndaǵy san alýan sharýalar men jobalardyń elorda tórinen bastaýyn alyp, jalǵasyn taýyp jatqany málim. Búgingi festıval Astananyń eń alǵash Arqa jerinde qazyǵyn bekitip, elorda mártebesin alǵan 1997 jyldan bastap jyl saıyn jas talanttardyń talabyn shyńdap, armanyna qanat baılap keledi», - delingen I.Tasmaǵambetovtyń quttyqtaýynda.
Festıvalǵa 11 memleketten 500-den astam úmitker qatysýda. 8 qarashada, festıvaldiń sońǵy kúninde «Shabyt» Gran-prı júldesimen qatar, eń daryndy qatysýshyǵa Qazaqstan Respýblıkasy Prezıdentiniń Kýbogi tabystalady.
