Astanada Sh. Ýálıhanov kóshesi jóndeý jumysyna baılanysty ishinara jabylady
ASTANA. KAZINFORM — Astanada Sh. Ýálıhanov kóshesiniń Bógenbaı batyr dańǵylynan S. Seıfýllın kóshesine deıingi aralyǵynda jol tóseminiń joǵarǵy qabatyn tóseý jumysy júrgiziledi, dep habarlaıdy elorda ákimdiginiń resmı saıty.
Osyǵan baılanysty, 25-29 tamyz aralyǵynda atalǵan ýchaskede kólik qozǵalysy ishinara jabylatyn bolady. Qozǵalys joldyń bir jaǵymen eki baǵytta uıymdastyrylady.
— Júrgizýshiler men jaıaý júrginshiler júrý baǵytyn aldyn ala josparlaýy jáne yqtımal ózgeristerdi eskerýi qajet. Qaýipsizdikti qamtamasyz etý jáne qolaısyzdyqty azaıtý úshin ýaqytsha jol belgileri men kórsetkishter ornatylatyn bolady, — delingen ákimdik taratqan habarlamada.
Osyǵan deıin Astananyń taǵy bir kóshesinde avtobýs jolaǵy engiziletinin jazǵanbyz.
