Astanada Sh. Shahaıdyń jeke fotokórmesi ashyldy
ANA. 11 jeltoqsan. QazAqparat /Jasulan Amanbaıuly/ - Búgin elordadaǵy Táýelsizdik saraıynda fototilshi, QR Jýrnalıster Odaǵynyń múshesi Shúkir Shahaıdyń jeke jumystarynyń kórmesi ashyldy.
Ekspozıtsııa jas, táýelsiz qazaq memleketiniń jylnamasy ispettes. Sebebi sýretshi 1990 jyldan bastap búgingi ýaqytqa deıin Qazaqstanda oryn alǵan mańyzy zor tarıhı oqıǵalardy baıandaıtyn eń tańdaýly jumystardy qoıǵan. Al kórmeniń eń negizgi tulǵasy - QR Prezıdenti Nursultan Nazarbaev. Fototilshiniń aıtýynsha, munda ár jyldary túsirilgen 120-dan astam foto ilingen. Sonymen qatar Qazaqstan úshin eleýli halyqaralyq oqıǵa bolyp tabylatyn EQYU-ǵa múshe Memleket basshylarynyń Sammıtinen de fotosýretter usynylyp otyr.
«Kórmege meniń 90-jyldary alǵash basylymdardan bastalyp, búgingi kásibı shyǵarmashylyǵymnyń kemeldengen shaǵyna deıingi eńbekterim qoıylyp otyr. Bul - El Táýelsizdiginiń júrip ótken jolyn sýretteıtin jylnamalyq kórme sııaqty. Sondaı-aq Qazaqstannyń EQYU-ǵa Tóraǵalyǵynyń quzar shyńy atanǵan Astana Sammıtinen de bir úzik týyndylarym bar. Sharanyń bastalar kezindegi qarbalas sátterdiń barlyǵyn túsirip, saqtap qaldym. Ásirese maǵan Elbasy Nursultan Nazarbaevtiń Sammıt bastalýyn jarııalaıyn dep saǵatyna qarap turǵan fotosýreti qatty unaıdy. Bul kórmeni men Qazaqstan Táýelsizdiginiń 20 jyldyǵy qurmetine arnaımyn», - deıdi Sh. Shahaı.
Sh. Shahaı eńbek jolyn Maqtaaral aýdandyq «Kommýnıstik eńbek» gazetinde fototilshi bolyp bastaǵan. Keıin ár jyldary «Qazaqstan pıoneri», «Halyq keńesi», 1990-1996 jyldary «Egemen Qazaqstan» «Jas Alash», «Túrkistan» gazetterinde istedi.
Sh. Shahaı 2002 jyldan beri QR Premer-Mınıstriniń jeke fototilshisi qyzmetin atqaryp júr.
