Astanada Sh. Qaldaıaqovtyń 80 jyldyq mereıtoıyna arnalǵan «Meniń Qazaqstanym!» atty Halyqaralyq án festıvali ótedi

QR Mádenıet mınıstrligi jáne «Qazaq áýenderi» AQ uıymdastyratyn festıvalǵa oblystyq án baıqaýlarynyń jeńimpazdary, sondaı-aq Qytaı, Mońǵolııa, Reseı, Tájikstan jáne Ózbekstanda turatyn qazaq dıasporalarynyń ókilderi qatysady. Festıvaldiń maqsaty - qazaqtyń án ónerin damytý, daryndy jastardyń shyǵarmashylyǵyna qoldaý kórsetý, Shámshi Qaldaıaqovtyń jáne qazaq kompozıtorlarynyń shyǵarmalaryn ulyqtap, buqara halyqqa nasıhattaý.

Festıvaldiń saltanatty ashylý rásimi 11 qarasha kúni saǵat 11.00-de Prezıdenttik mádenıet ortalyǵynda bolady. Qazaqstandyq oryndaýshylardyń eki kúndik irikteý kezeńi de atalǵan ǵımaratta uıymdastyrylady. Al 13 qarashada saǵat 19.00-de «Qazaqstan» Ortalyq kontsert zalynda festıvaldiń jeńimpazdary men laýreattaryn marapattaý rásimi jáne gala-kontsert ótip, oǵan qazaq estradasy juldyzdary, atap aıtqanda B.Tólegenova, N.Núsipjan, A.Qorazbaev, Q.Ábildına, N.Úsenbaeva, R.Stamǵazıev, B.Sámedınova, T.Zabırova, M.Arynbaev, A.Jorabaeva, R.Nurjigitov, M.Sádýaqasova, «Jigitter» toby qatysady.

Qazaqstannyń belgili óner qaıratkerlerinen qurylǵan qazylar alqasyn KSRO halyq ártisi, KSRO memlekettik syılyǵynyń laýreaty, professor Bıbigúl Tólegenova basqarady.

Shámshi Qaldaıaqov - kórnekti kompozıtor, Qazaqstannyń halyq ártisi, halyq ánderiniń oryndaýshysy, aqyn, qazirgi qazaq estradasynyń negizin qalaýshy, 1930 j. 15 tamyzda Shymkent (qazirgi Ońtústik Qazaqstan) oblysy, Qyzylqum aýdanynda týyp ósti. 1956-1962 j.j. Almatyda Qurmanǵazy atyndaǵy Memlekettik konservatorııada oqydy.

Shámshiniń ánderi tań qaldyrarlyq áýendilikpen, ózindik dybys pen lırıkasymen erekshelenedi. Olar án mádenıetiniń ajyramas bóligine aınaldy. Shámshi shyn máninde ótken ýaqyttyń, qazirgi kezgi jáne keleshektiń kompozıtory bolyp esepteledi. Ol osy kezeńderdegi ıntonatsııalardyń barlyǵyn óz mýzykasynda biriktire bilgen. Kompozıtordyń shyǵarmashylyq murasy úsh júzden astam ánderden turady.