Astanada Seıfýllın men Jeńis kóshesindegi úılerge sý qaıtadan berildi
ASTANA. 6 qańtar. QazAqparat - Astanada Seıfýllın kóshesindegi №30 úıde sý qubyrynyń jarylýyna baılanysty sý berý toqtatylǵan turǵyn úıler qazir tolyqtaı sýmen qamtamasyz etildi. Bul týraly «Astana sý arnasy» MKK baspasóz qyzmetkeri Álibek Haırýllın málimdedi.
Esterińizge sala keteıik, búgin Astanada Seıfýllın kóshesindegi №30 úıde sý qubyrynyń buzylýyna baılanysty Seıfýllın kóshesi men Jeńis dańǵylyndaǵy turǵyn úılerge sý berý toqtatylǵan bolatyn.
«Apatty ýchaskede jóndeý jumystaryn júrgizý úshin Seıfýllın kóshesi men Jeńis dańǵylynyń boıyndaǵy turǵyn úılerge 1 saǵatqa sý berý toqtatylǵan bolatyn. Al qazir barlyq úılerge sý berildi. Apat ornynda «Astana sý arnasynyń» 35 adamynan quralǵan 3 brıgadasy men 20 tehnıkasy dıametri 700 mm sý qubyryn jóndeý jumystary júrgizip jatyr. Jumys keshki saǵat 6-ǵa deıin jalǵasady. Osy ýaqyt aralyǵynda turǵyndarǵa eshqandaı qolaısyzdyq týǵyzylmaıdy. Avtokólik joldary da jabylmaıdy», - dedi Á. Haırýllın.
