Astanada «Serper» mýzyka festıvaliniń qorytyndy kontserti ótip jatyr
ASTANA. QazAqparat - Qazir Astananyń ortalyq alańynda VI «Serper» mýzyka festıvaliniń qorytyndy kontserti ótip jatyr. Halyq aspaptary orkestrlerinen quralǵan ansamblder qala turǵyndary men qonaqtaryna erekshe syı tartpaq, dep habarlaıdy 24.kz.
Qazaqstan men Reseıdiń ártisteri 3 kún boıy túrli halyq áýenderin oryndap, kópshilikti tamsandyrýda. Alaıda búgingi qorytyndy kontserttiń basty bir ereksheligi bar. Sharaǵa qatysyp otyrǵan 7 ansambldegi 300 adam birigip, bir týyndyny oryndamaqshy. Bul mýzykalyq ujymdardyń arasynda qyzylordalyq halyq aspaptary orkestri, Aqmola oblystyq fılarmonııasy orkestri, Aqtaý men Óskemen qalalarynan kelgen ansamblder bar. Al festıvaldiń basty qonaqtary Bashqurtstan Respýblıkasynyń ulttyq halyq aspaptar orkestri men Omby qalasynyń «Lad» orys kameralyq orkestri boldy. Árıne, túrli ult ókilderiniń birigip, qazaq halyq áýenderin oryndaýy estýge de, kórýge de turarlyq kórinis ekendigi sózsiz.
Esterińizge salaıyq, «Serper» festıvali 4 shildede bastaldy. Ótken 2 kún ishinde halyq aspap orkestrleri elordamyzdyń birneshe saıabaqtarynda kontsertter berip úlgerdi.
