Astanada «Sergek» júıesi arqyly 523 qylmystyq is ashyldy
Búgin bas qaladaǵy ahýal ortalyǵyna Astana qalasynyń ákimi Áset Isekeshev pen «Atameken» UKP Prezıdıýmynyń tóraǵasy Tımýr Qulybaev keldi. Sapar barysynda olar ІT tehnologııa salasyndaǵy Qazaqstannyń eń birinshi eksport ónimderimen tanysty.
Mamandar foto-beınetirkeý júıesin engizýdiń artyqshylyqtary týraly aıtyp berdi. Mamandardyń aıtýynsha, kameranyń arqasynda qylmystar aıtarlyqtaı azaıǵan. «Sergek» kamerasyn ornatý orta eseppen alǵanda qylmys sanyn 30 paıyzǵa, jol-kólik oqıǵalaryn - 18 paıyzǵa tómendetken.
«Kólik júrgizýshileriniń tártibi kúsheıdi. Odan basqa, 500-den astam qylmystyq is ashyldy, onyń ishinde 4 kisi ólimi bar», - dedi Áset Isekeshev.
Ákimniń sózine qaraǵanda, qazirgi tańda qoǵamdyq oryndarda adamnyń túr-álpetin tanı alatyn júıeni engizý jumystary júrgizilip jatyr. Bul jańashyldyq (noý-haý) polıtseılerdiń jumysyna kóp kómegin tıgizedi, ıaǵnı TJ jaǵdaıy men jappaı tóbelesti tártip saqshylary gadjet arqyly kóre alady. Bul jaǵdaıdy baǵalaýǵa jáne tıimdi áreket jasaýǵa múmkindik beredi. Sondaı-aq, búginde júıe qasaqana tártip buzýshylar men qaryzy barlardy da avtomatty túrde anyqtap bere alady.
Tımýr Qulybaev júıeniń jumysyna oń baǵa berip, jekemenshik bıznes aýmaǵynda da kamera ornatýda birigip áreket jasaýǵa ýáde berdi.
Búginde qalada 6365 kamera biriktirilip, ornatylǵan. 1 maýsymǵa deıin Astanada 13 myń jol kamerasyn montajdap, iske qosýdy josparlanyp otyr.