Astanada Senat depýtattyǵyna kandıdat Serik Jaqsybekov daýystyń basym bóligin jınady

Elorda atynan Senat depýtattyǵyna kandıdat retinde Serik Jaqsybekov, Aleksandr Smorodın, Beısembek Qarataev usynyldy.

Astanadaǵy M.Ótemisuly atyndaǵy oqýshylar saraıynda elordalyq máslıhat depýtattarynyń basym bóligi óz daýystaryn Serik Jaqsybekovke berdi. Atap aıtqanda, daýys berý úderisine tańdaýshylardyń 25-i qatysty. S.Jaqsybekov daýystardyń 23-in jınasa, ekinshi kandıdat Aleksandr Smorodınge tańdaýshylardyń ekeýi daýys berdi. Daýys berý barysynda eshqandaı eskertýler túspedi.

Aıta keteıik, búgin Qazaqstanda QR Parlament Senaty depýttarynyń saılaýy ótip jatyr. QR Prezıdenti Nursultan Nazarbaevtyń Jarlyǵyna sáıkes, Qazaqstan Respýblıkasynyń Parlament Senatyna depýtattar saılaýy 1995 jylǵy 28 qyrkúıektegi «Qazaqstan Respýblıkasyndaǵy saılaý týraly» Qazaqstan Respýblıkasynyń Konstıtýtsııalyq zańynyń 69-babymen, Qazaqstan Respýblıkasy Konstıtýtsııasynyń 44-babynyń 2-tarmaqshasyna sáıkes 2014 jyldyń 1 qazanyna belgilengen. Eske sala keteıik, Senat depýtattarynyń saılaýyna 39 úmitker qatysady.

Kúntizbelik josparǵa sáıkes, 29 qyrkúıek kúni saǵat 24.00-de úmitkerlerdiń saılaýaldy úgit-nasıhat jumystary aıaqtaldy. Úgit-nasıhat sharasynyń aıasynda saılaýshylarmen 11-29 qyrkúıek aralyǵynda aımaqtarda 266 kezdesý ótti. 30 qyrkúıek, sonymen birge daýys berý kúni - 1 qazanda kez kelgen saılaýaldy úgit-nasıhatqa tyıym salyndy.

Saılaý zańnamasynyń talabyna sáıkes qazirgi ýaqytta tańdaýshylardyń barlyq tizimi jergilikti buqaralyq aqparat quraldarynda jarııalandy. Tańdaýshylardyń birlesken otyrysy eger oǵan oblystyń barlyq máslıhattarynan saılanǵan depýtattardyń 50 paıyzdan astamy qatyssa, zańdy bolyp sanalady. Daýys berý ótti dep sanalý úshin, oǵan tańdaýshylardyń birlesken otyrysynda 50 paıyzdan astamy qatysýy kerek. Saılaýǵa qatysqan tańdaýshylar daýsynyń 50 paıyzdan astamyn jınaǵan úmitker saılanǵan dep sanalady.