Astanada semserlesýden halyqaralyq týrnır márege jetti
ASTANA. 12 qarasha. QazAqparat - Elordada semserlesýden «Astana qylyshy» ekinshi halyqaralyq týrnıri aıaqtaldy.
Astana resmı saıtynyń málimetinshe, saıysqa Qazaqstan, Reseı jáne Qyrǵyzstannan barlyǵy - 11 komanda qatysty. Alaıda, týrnır qorytyndysy boıynsha barlyq júldeli oryndarǵa qazaqstandyq saıysshylar ıe boldy.
Birinshi oryn resmı emes komandalyq esepte Ońtústik Qazaqstan oblysyna buıyrdy. Olar bes altyn, bir kúmis jáne úsh qola medalge qol jetkizdi. Ekinshi orynda - úsh altyn, bes kúmis, jeti qola medal alǵan Shyǵys Qazaqstan oblysynyń sportshylary. «Úshtikti» ár jetistikten úsh-úsh medalden alǵan Almaty qalasynyń komandasy qorytyndylap tur.
Jeke birinshilik boıynsha keýdesine altyn medal taqqan Qazaqstan quramasy kóshbasshylarynyń biri, almatylyq Dmıtrıı Aleksanın ótken týrnır týraly óz pikirin bylaı bildiredi: «Uıymdastyrylýy óte jaqsy boldy. Barlyq qarsylastar da maǵan tanys, túrli jarystarda ylǵı kezdesip júremiz. Meni jas jigitterdiń kúsh-jigeri qýantty. Bul, qazaqstandyq kásibı saıystardyń deńgeıi barǵan saıyn ósip keledi degen sóz. Biz álem Kýbogy jarysynda «úshtiktemiz», al Azııa chempıonatynda únemi júldeli orynǵa ıe bolamyz».
