Astanada semserlesýden ashyq týrnır ótip jatyr
ASTANA. QazAqparat - «Barys» muz saraıynda semserlesýden V «Astana qylyshy» halyqaralyq ashyq týrnıri ótip jatyr. Jarys 24 qyrkúıekke deıin jalǵasady. Bul týraly qala ákimdiginiń saıty habarlady.
Týrnırge Ulybrıtanııa men Qyrǵyzstannan, Qazaqstannyń oblystary men qalalarynan (Almaty, Shyǵys Qazaqstan, Soltústik Qazaqstan jáne Ońtústik Qazaqstan oblystary, Almaty, Qaraǵandy jáne Astana qalalary) sportshylar qatysady.
Jarystyń ashylý saltanatynda 200 jýyq sportshy olımpıadalyq marshpen júrip ótti.
- Qurmetti dostar, Astanaǵa qosh kelipsizder! Bıyl «Astana qylyshy» týrnıri Qazaqstan Respýblıkasynyń elordasynda besinshi ret ótkizilip jatyr. Sportshylarǵa jeńis qana tileımin! Eń myqtylary top jarsyn! Semserlesýden V «Astana qylyshy» halyqaralyq ashyq týrnırin ashyq dep jarııalaýǵa ruqsat etińizder! - dedi Astana qalasynyń dene shynyqtyrý jáne sport basqarmasy basshysynyń orynbasary Samat Qabdýlın.
Jarys eki jas sanatynda ótedi: 1999 j.t. jáne 2000 j.t. Sportshylar jeke jáne komandalyq esepte kúsh synasady.
Jarystyń alǵashqy kúniniń qorytyndysy boıynsha aǵylshyn Stıven Beıtmen aqtyq synǵa ótip, 3-orynǵa taban tiredi. Ol týrnır chempıony atanǵan almatylyq Albert Sheshınge ese jiberdi. Kadetter arasynda qazaqstandyq Ilhamjan Anarqulov top jardy. Áıelder arasynda Almaty qalasynyń sportshysy Melanı Hamraeva, kadetter arasynda almatylyq Aleksandra Tambovtseva chempıon atandy. Komandalyq jarystarda erler arasynda Almaty q. RMI komandasy, áıelder arasynda Almaty qalasynyń komandasy úzdik dep tanyldy. Jeńimpazdarǵa Astana qalasy ákimdiginiń Dene shynyqtyrý jáne sport basqarmasynyń dıplomdary tabystaldy.
Adına Ázimhanova, Mansur Esteý sáıkesinshe, «Jeńiske degen erki úshin» jáne «Týrnırdiń eń tehnıkalyq semserlesýshisi» dıplomdarymen marapattaldy. Eń jas qatysýshylar Astana qalasynyń fızıka-matematıkalyq baǵyttaǵy Nazarbaev Zııatkerlik Mektebiniń dırektory M. Jakenovtyń atynan tıisti dıplomdar men syılyqtarǵa ıe boldy.
