Astanada segiz jolaqty jańa kópir salynbaq
ASTANA. KAZINFORM — Astanada Hýseın ben Talal kóshesin Ál-Farabı dańǵylynan Shámshi Qaldaıaqov kóshesine deıin uzartý josparlanyp otyr. Joba aıasynda Esil ózeni arqyly jańa avtokólik kópiri salynady. Bul týraly elordanyń Kólik jáne jol-kólik ınfraqurylymyn damytý basqarmasy málimdedi.
— Astana qalasynyń Bas josparyna sáıkes, Hýseın ben Talal kóshesin Ál-Farabı dańǵylynan Shámshi Qaldaıaqov kóshesine deıin jalǵastyrý kózdelgen. Kóshe Esil ózenimen toǵysatyn tusta avtokólik kópiri salynady, — delingen basqarma habarlamasynda.
Jańa jol sol jáne oń jaǵalaýdy baılanystyratyn taǵy bir kólik baǵytyna aınalady. Osylaısha, qaladaǵy kólik kóp júretin negizgi kóshelerge túsetin júktemeni azaıtý kózdelip otyr.
Atap aıtqanda:
— Syǵanaq kóshesi men Uly Dala dańǵylyndaǵy kólik qozǵalysy azaıady. «Nurly jol» vokzaly nemese Almaty aýdanyna qaraı júretin júrgizýshiler Hýseın ben Talal kóshesi arqyly júre alady;
— sol jaǵalaýdaǵy negizgi joldardyń biri — Máńgilik El dańǵylyndaǵy kólik qozǵalysy da azaıady. Óıtkeni kólikterdiń bir bóligi jańa baǵytqa aýysady;
— Syǵanaq kóshesindegi Esil ózeni arqyly ótetin «Arys» kópiri men Táýelsizdik dańǵylyndaǵy kópirge túsetin júkteme azaıady. Bul ásirese qarbalas ýaqytta kópirlerge kirip-shyǵatyn joldardaǵy keptelisti azaıtýǵa múmkindik beredi.
Joba boıynsha Hýseın ben Talal kóshesi jalpy qalalyq mańyzy bar magıstral bolady. Jol segiz jolaqty etip salynady.
— Qazir ınvestor Esil ózeni arqyly ótetin kópirdiń jobasyn ázirlep jatyr. Qurylystyń naqty quny joba daıyn bolyp, memlekettik saraptamanyń qorytyndysy shyqqannan keıin belgili bolady, — dep habarlady basqarma.
Investor daıyn jobany qala balansyna ótkizgennen keıin Kólik basqarmasy kópirdi memlekettik qarajat esebinen salý máselesin qaraıdy. Qurylys jumystaryn júrgizetin merdiger memlekettik satyp alý arqyly anyqtalady.
Ázirge kópir qurylysynyń qashan aıaqtalyp, paıdalanýǵa beriletini belgisiz. Merzimi jobanyń qarjylandyrylýyna baılanysty bolady.
Buǵan deıin Astananyń 2026 jylǵa naqtylanǵan bıýdjetiniń jalpy kólemi 1 490 674 mln teńgeni ekeni habarlandy.
