Astanada saılaý kúni 3 myńǵa jýyq polıtseı qoǵamdyq tártipti qadaǵalaıtyn bolady
ASTANA. QazAqparat - Elordada Parlament Májilisi depýtattarynyń kezekten tys saılaýyn jáne Astana qalasy máslıhattary depýtattarynyń kezekti saılaýyn uıymdastyrý men ótkizýge arnalǵan qorytyndy brıfıng ótti, dep habarlaıdy qala ákimdiginiń resmı saıty.
Saılaý kúni 213 saılaýda daýys berý ýchaskesi jumys isteıdi, sonyń ishinde 178-i barsha halyq úshin ashylady, onda táýlik boıy jumys isteıtin 625 polıtseı qyzmet atqarady. Jalpy, saılaý kúni qalada 3000 jýyq polıtseı qoǵamdyq tártipti qadaǵalaıtyn bolady.
Jergilikti polıtsııa qyzmetiniń basshysy Baqytjan Malybaevtyń aıtýynsha, Astana qalasynyń ishki ister departamenti saılaý ótkizý barysynda joldarda tártipti jáne qaýipsizdikti qamtamasyz etý úshin barlyq sharalardy qabyldaýda. 16-18 naýryzda «Quqyqtyq tártip» jedel aldyn alý is-sharasy ótkizildi. Al kesheden bastap 24 naýryzǵa deıin ІІD organdarynyń jeke quramy kúsheıtilgen rejimde jumys isteıdi.
- Saılaý ýchaskelerinde 625 polıtseı táýlik boıy jumys isteıdi. Jeke quramnan 3000 jýyq qyzmetker saılaý jáne mereke kúnderi qaýipsizdikti qamtamasyz etedi. Qala mańynda ornalasqan barlyq beketter de kúsheıtilgen rejımde jumys isteýge kóshedi, - dedi B. Malybaev.
Aıta keteıik, elorda ákimdi jańadan 26 saılaý ýchaskesin qurý týraly sheshim qabyldaǵan bolatyn.
Astana qalasy Іshki saıasat basqarmasynyń basshysy Erlan Kanalımovtyń aıtýynsha, 278 saılaý ýchaskesi ashylady, sonyń ishinde 65-i shetelde ornalasqan, ıaǵnı qalada 213 ýchaske jumys isteıdi. 35 saılaý ýchaskesine kirýge shekteý qoıylsa, qalǵan 178 ýchaskede halyq daýys bere alady.
- Qazirgi kezde qala boıynsha saılaýshylar tiziminde 405 233 adam tirkelgen. Syrtqy ister mınıstrliginiń jelisi boıynsha - 14 303 saılaýshy. Azamattarǵa qolaıly bolýy úshin árbir saılaý ýchaskesinde shaǵyn HQKO jumys isteıdi. Eger azamat saılaý kúni ózin saılaýshylar tizimnen taba almasa, ol ótinish berip, mekenjaı anyqtamasyn alady. Ótken jyly saılaýda 30 myńǵa jýyq adam osyndaı shaǵyn halyqqa qyzmet kórsetý ortalyqtarynyń kómegine júgingen, - dep atap ótti E. Kanalımov.
Onyń sózine qaraǵanda, barlyq saılaý ýchaskelerinde kontserttik baǵdarlamalar, jármeńkeler uıymdastyrylady. Jalpy, 45 mln teńgeden astam somanyń ónimin satý kózdelgen. Sonymen qatar, saılaý kúni azamattardyń barlyq sanattary úshin qalalyq qoǵamdyq kólikpen jol júrý tegin bolady.
Ádettegideı, birinshi bolyp kelgen jáne alǵash ret daýys beretin, sondaı-aq, 20 naýryzda týǵan kúnin merekeleıtin saılaýshylarǵa estelik syılyqtar tabystalady.
