Astanada saıası qýǵyn-súrgin qurbandaryna arnalǵan kórme ashyldy
ASTANA. 3 maýsym. QazAqparat /Jasulan Amanbaıuly/ - QR Ulttyq akademııalyq kitaphanasynda saıası qýǵyn-súrgin qurbandaryna arnalǵan «Tarıh, ýaqyt jáne zaman» atty kitap-qujattyq kórmesi ashyldy.
Shara 31 mamyr - Saıası qýǵyn-súrgin qurbandaryn eske alý kúnine oraı uıymdastyryldy. Kórme negizin QR Ulttyq akademııalyq kitaphanasynyń jáne Saıası qýǵyn-súrgin jáne totalıtarızm qurbandarynyń «ALJIR» memorıaldy-murajaı kesheniniń qoryndaǵy, sonymen birge murajaı qyzmetkerleriniń ǵylymı ekspedıtsııalary kezinde Orynbor, Máskeý, Omby, Almaty, Táshkent, Qyzylorda qalalarynan jınaǵan «ALJIR» lageri tutqyndarynyń taǵdyry taqyrybyn ashatyn fotoqujattar, hattar jáne olardyń jeke zattary quraıdy. Oǵan Sultanbek Qojanov, Nyǵmet Nurmaqov, Tórebek Osmanov syndy Alash qozǵalysy, sonymen qatar qazaqtyń kózi ashyq, kókiregi oıaý, ult bostandyǵyn basty murat etken zulmat zamannyń sanaly azamattardyń QarLAG lagerindegi fotosýretteri, muraǵattyq qujattar enip otyr. Sonymen qatar «Halyq jaýynyń zaıyby» atalyp, taǵdyrlary tálkekke túsken Gúljamal Maılına, Ázıza Rysqulova, Márıám Antsıs sııaqty batyr áıelder jáne olardyń balalary týraly materıaldar usynylǵan.
KSRO-da talaıdyń ómirin tozaqqa aınaldyrǵan 953 lager bolsa, sonyń úsheýi elimiz aýmaǵynda quryldy. Osyndaǵy atynan adam shoshyrlyq «ALJIR» lageri KSRO-daǵy áıelder qamalǵan jalǵyz azaptaý orny boldy.
Kórmeniń ashylýy barysynda kelýshilerge «Biz kýámiz» derekti fılmi kórsetildi.
