Astanada saıası qýǵyn-súrgin qurbandaryn eske aldy (FOTO)
ASTANA. QazAqparat - Nazarbaev Ýnıversıtetiniń Joǵary bilim berý mektebinde Saıası qýǵyn-súrgin jáne asharshylyq qurbandaryn eske alý kúnine baılanysty shara ótti.
Buǵan joǵary oqý ornynyń stýdentteri men oqytýshylary, Qazaqstan halqy Assambleıasynyń ókilderi, ALJIR (Otanyn satqandarynyń áıelderine arnalǵan Aqmola lageri) jáne Qarlag (Qaraǵandy túzeý-eńbek lageri) murajaılarynyń ǵylymı qyzmetkerleri qatysty.
«Bul kúnniń Qazaqstan úshin erekshe mańyzy bar, sebebi ol bizdiń halqymyz tarıhynyń bilýimiz jáne este saqtaýǵa tıis qaıǵyly paraqshalaryn ashady. Ótken ǵasyrdyń 1930-1950 jyldary jappaı saıası repressııalarǵa toly boldy, sol ýaqytta júzdegen myń adamdarymyzdan aıyryldyq. Olarǵa saıası qylmys jasady degen jala jabylyp, kóbi atyldy. Adamdar arnaıy qurylǵan lagerlerge jiberildi, bul lagerlerdiń kóbi Qazaqstannyń aýmaǵynda boldy. Sottalǵandardyń arasynda bizdiń ulttyq elıtamyzdyń kóptegen ókilderi, Qazaqstannyń damýyna úlesterin qosqan talaı azamattar bolǵan. Qazirgi kezde ádildik ornady, zańsyz sottalǵandar aqtaldy», - dep atap ótti sharanyń moderatory, Nazarbaev Ýnıversıtetiniń Joǵary bilim berý mektebiniń qaýymdastyrylǵan professory Sulýshash Kerimqulova.
Qarlag-tyń eki tutqyny saqtaǵan «Qyz Jibek» poemasy qoljazbasynyń tusaýkeseri bul sharanyń mańyzdy sátine aınaldy. Ony qalaı tapqandyǵy jaıly Nazarbaev Ýnıversıtetiniń Joǵary bilim berý mektebiniń professory Dúıshon Shamatov áńgimeledi. Onyń týysy Kúzebaı atanyń Qarlag-tan bosatylǵan sátinde kamerada birge otyrǵan adam oǵan «Qyz Jibek» poemasynyń qoljazbasyn berip jibergen. Bul qoljazba uzaq jyldar boıy olardyń otbasynda, Qyrǵyzstanda saqtaldy.
