Astanada «Saıahat 2026» halyqaralyq týrıstik forýmy ótedi
ASTANA. KAZINFORM — Astanada 17-19 qyrkúıek aralyǵynda «Saıahat 2026» Kazakhstan Travel Forum halyqaralyq týrıstik forýmy ótedi, dep habarlaıdy elorda ákimdiginiń resmı saıty.
«Táýekelsiz týrızm» taqyrybyna arnalǵan is-sharaǵa memlekettik organdardyń, týrıstik bıznes ókilderiniń, áýe kompanııalary men qonaqúı salasynyń mamandary, sondaı-aq halyqaralyq seriktester qatysyp, týrızmdi qaýipsiz damytý máselelerin talqylaıdy.
17 qyrkúıekte forým qatysýshylary úshin elordanyń týrıstik ınfraqurylymymen tanysý baǵdarlamasy uıymdastyrylady. Onyń aıasynda Astana boıynsha sholý ekskýrsııasy jáne qonaqúı nysandaryna ınfotýr ótkiziledi.
Forýmnyń negizgi iskerlik kúni 18 qyrkúıekte EXPO halyqaralyq kórme ortalyǵynda ótedi. Baǵdarlamada paneldik pikirtalastar men saraptamalyq sessııalar, B2B kezdesýleri, týrıstik ónimderdiń tanystyrylymdary, halyqaralyq kórme ekspozıtsııasy jáne kelisimderge qol qoıý rásimi qarastyrylǵan.
19 qyrkúıekte forým Astananyń Ortalyq saıabaǵynda «Týrızm — árkimniń isi» tujyrymdamasy aıasyndaǵy qalalyq merekemen jalǵasady.
Elorda turǵyndary men qonaqtary úshin qalalyq júgirý jarysy, gastronomııalyq festıval, sporttyq jáne otbasylyq is-sharalar, sondaı-aq mádenı baǵdarlama uıymdastyrylady.
Aıta keteıik, Qazaqstan alǵash ret Germanııanyń iri týrıstik forýmyn qabyldady.
