Astanada saıabaqtar men gúlzarlarda aýqymdy tekserý júrip jatyr
ASTANA. KAZINFORM — Astanada «Zań men tártip» qaǵıdaty men respýblıkalyq «Taza Qazaqstan» ekologııalyq bastamasy aıasynda aýqymdy profılaktıkalyq reıdter bastaldy, dep habarlaıdy Astana ákimdiginiń resmı saıty.
Búgin mundaı shara Botanıkalyq baqta ótti. Aldaǵy ýaqytta osyndaı reıdter elordanyń saıabaqtary, gúlzarlary jáne basqa da qoǵamdyq oryndarynda turaqty túrde uıymdastyrylatyn bolady.
Reıdke elordanyń Esil aýdany ákimdiginiń qyzmetkerleri, qalalyq Polıtsııa departamentiniń ókilderi jáne qoǵam belsendileri qatysty.
Іs-shara barysynda abattandyrý qaǵıdalaryn buzý jaǵdaılarynyń aldyn alýǵa erekshe nazar aýdaryldy.
Sonymen qatar Botanıkalyq baq aýmaǵynda zańsyz saýda jasaýǵa jáne balalarǵa arnalǵan elektr kólikterin ruqsatsyz jalǵa berýge jol bermeý boıynsha jumys júrip jatyr. Óıtkeni ruqsat qujattarynsyz kórsetiletin mundaı qyzmet tutynýshylardyń ómiri men densaýlyǵyna qaýip tóndirýi múmkin.
Mamandar eń aldymen turǵyndarǵa túsindirý júrgizip jatyr.
— Biz polıtsııa qyzmetkerlerimen birlesip túsindirý jumysyn júrgizip jatyrmyz. Azamattarǵa ózderinen keıin qoqys qaldyrýǵa jáne Botanıkalyq baq aýmaǵynda pıknık uıymdastyrýǵa bolmaıtynyn túsindiremiz. Botanıkalyq baq — oıyn-saýyq saıabaǵy emes, munda sırek kezdesetin ósimdikter ósedi. Bul jerge balalarmen serýendep, taza aýamen tynystaý úshin keledi. Eger zań buzýshylyq qaıtalansa, polıtsııa qyzmetkerleri abattandyrý qaǵıdalaryn buzǵany úshin ákimshilik aıyppul salady, — dedi Esil aýdany ákiminiń orynbasary Baqytjan Aldaýov.
Astana qalasy Polıtsııa departamenti Qoǵamdyq qaýipsizdik basqarmasy bastyǵynyń orynbasary, polıtsııa podpolkovnıgi Erkin Janábil qoǵamdyq keńistikterdegi baqylaýdyń quqyqtyq jaǵyna toqtaldy.
— Jyl basynan beri júrgizilgen is-sharalar barysynda Botanıkalyq baqqa irgeles aýmaqta abattandyrý qaǵıdalaryn buzǵany úshin 700-den astam adam ákimshilik jaýapkershilikke tartyldy. Qazaqstan Respýblıkasy Ákimshilik quqyq buzýshylyq týraly kodeksiniń 505-babynyń birinshi bóligine sáıkes eskertý jasaý nemese 20 aılyq eseptik kórsetkish mólsherinde aıyppul salý kózdelgen. Sonymen qatar belgilenbegen oryndarda saýda jasaǵany úshin 300-den astam adam jaýapkershilikke tartyldy. Bul quqyq buzýshylyq úshin 10 aılyq eseptik kórsetkish mólsherinde aıyppul qarastyrylǵan, — dedi Erkin Janábil.
Aıta keteıik, elorda aýmaǵynda abattandyrý qaǵıdalaryn buzý jaǵdaılaryn anyqtaý jáne zańsyz saýdanyń jolyn kesý maqsatyndaǵy reıdtik is-sharalar kún saıyn ótkizilip keledi.
Buǵan deıin Astanada qurylys qaldyqtaryn zańsyz tógýge qarsy reıdter bastalǵany belgili boldy.
