Astanada saıabaqtaǵy tazalyq pen qoǵamdyq tártip tekserildi
ASTANA. KAZINFORM — «Taza Qazaqstan» ekologııalyq aktsııasy jáne «Zań men tártip» qaǵıdaty aıasynda elordadaǵy Atatúrik saıabaǵynda tazalyq pen qoǵamdyq tártipti saqtaý maqsatynda kezekti reıd ótti, dep habarlaıdy Astana ákimdiginiń resmı saıty.
Elordada tazalyq pen qoǵamdyq tártipti qamtamasyz etýge baǵyttalǵan reıdter turaqty túrde ótkiziledi. Bul rette abattandyrý talaptarynyń saqtalýyna jáne qoǵamdyq oryndardyń tazalyǵyna erekshe mán beriledi.
— Baıqońyr aýdanynda mundaı profılaktıkalyq reıdter turaqty túrde ótkiziledi. Bizdiń mindetimiz — abattandyrý talaptarynyń saqtalýyn baqylaýmen qatar, turǵyndardyń qoǵamdyq oryndarǵa degen jaýapkershiligin arttyrý. Saıabaqtar, gúlzarlar jáne basqa da demalys oryndary qala turǵyndary úshin taza, qaýipsiz ári jaıly bolýy kerek. Sondyqtan árbir turǵyn qorshaǵan ortaǵa uqypty qarap, belgilengen talaptardy saqtaýy mańyzdy, — dedi Baıqońyr aýdany ákimi apparatynyń ishki saıasat bóliminiń basshysy Arman Baıanbekov.
Elorda turǵyndary da mundaı sharalardyń qaladaǵy demalys oryndarynyń qolaıly ári jaıly bolýyna yqpal etetinin atap ótti.
— Qala turǵyny retinde mundaı sharalar qajet dep sanaımyn. Saıabaqtarǵa kún saıyn balasyn jetektegen otbasylar, jastar men egde jastaǵy adamdar demalýǵa keledi. Sondyqtan munda tazalyq pen tártiptiń saqtalǵany mańyzdy. Ár adam qoǵamdyq oryndarǵa uqypty qarap, artynan qoqys qaldyrmaýy kerek dep oılaımyn, — dedi qala turǵyny.
Qoǵamdyq oryndardaǵy profılaktıkalyq reıdter qalanyń barlyq alty aýdanynda jalǵasyn tabady.
Buǵan deıin Astanada Esil ózenin tazartý boıynsha keshendi jumystar júrip jatqanyn jazǵan edik.
