Astanada Sáýlet-qala qurylysy keńesi qurylady
ASTANA. KAZINFORM – QR Parlamenti palatalarynyń birlesken otyrysynda «Qazaqstan Respýblıkasy astanasynyń mártebesi týraly» zań jobasy birinshi oqylymda maquldandy.
Qujatty talqylaý kezinde QR Ulttyq ekonomıka vıtse-mınıstri Baýyrjan Omarbekov baıandama jasady.
Onyń sózinshe, Memleket basshysy aıqyndaǵan konstıtýtsııalyq reformanyń jalǵasy retinde elordanyń quqyqtyq mártebesin jańa deńgeıde bekitý erekshe mańyzǵa ıe. Óıtkeni, Astana – búgingi tańda tek ákimshilik ortalyq qana emes, elimizdiń saıası basqarý, ekonomıkalyq belsendilik, ınvestıtsııalyq tartymdylyq, sondaı-aq qoǵamdyq damý úderisteriniń negizgi shoǵyrlanǵan ortalyǵy.
– Elordanyń qarqyndy damýy, halyq sanynyń turaqty ósýi, onyń ishinde ýrbanızatsııa protsesteriniń kúsheıýi óz kezeginde quqyqtyq jáne basqarýshylyq tetikterdi odan ári jetildirýdi qajet etedi. Osyǵan baılanysty «Qazaqstan Respýblıkasy astanasynyń mártebesi týraly» Konstıtýtsııalyq zań jobasy ázirlendi. Konstıtýtsııalyq zań jobasynyń negizgi maqsattary men mindetteri – astananyń erekshe mártebesin aıqyndaý, memlekettik basqarý tıimdiligin arttyrý jáne turǵyndar úshin qolaıly ári qaýipsiz qalalyq orta qalyptastyrý, - dedi vıtse-mınıstr.
Atap aıtqanda, astana máslıhaty men ákimdigine sáýlet jáne qala qurylysy, jol qozǵalysy, halyqty áleýmettik qorǵaý, ekologııa, týrızm, kommýnaldyq menshikti basqarý jáne t.b. negizgi quzyretter beriledi.
Máslıhat pen ákimdiktiń quzyretteri joǵaryda atalǵan túzetýlermen ǵana shektelmeıdi, ózge de salalyq zańdarda kózdelgen quzyretteri saqtalady. Bul rette, qala mańy aımaǵynyń kólemi men shekarasy jáne ony paıdalaný tártibi, qala jáne oblys máslıhattary men ákimdikteriniń birlesken usynystary boıynsha Úkimet belgileıdi.
Sonymen qatar elordanyń áleýmettik-ekonomıkalyq damýy, turǵyndardyń tynys-tirshiligin qamtamasyz etý, arnaýly trassalardy jáne avtomobıl joldaryn sanıtarııalyq tazartý, týrızmdi damytý, sondaı-aq jer máselelerin retteý boıynsha tıisti uıymdardyń quqyqtyq mártebesi aıqyndalady.
– Astanada kólik ınfraqurylymyn basqarý, jol júrisin uıymdastyrý jáne qalanyń avtoturaq keńistigin retteý fýnktsııalary Jol júrisin uıymdastyrý ortalyǵy arqyly júzege asyrylady. Astananyń ormandy saıabaq aımaǵy – qala aýmaǵy shegindegi qorǵaý, saýyqtyrý jáne rekreatsııalyq fýnktsııalarǵa arnalǵan jerleri. Onyń shekaralaryn belgileý jáne ózgertý Astana ákimdiginiń usynýy boıynsha Úkimet júzege asyrady, - dedi Baýyrjan Omarbekov.
Odan bólek, aımaqtyń ekologııalyq jaǵdaıyna teris áser etetin kez kelgen qyzmetti júzege asyrýǵa tyıym salý kózdeledi. Sondaı-aq zań jobasynda astananyń biryńǵaı sáýlettik kelbetin qalyptastyrýǵa erekshe nazar aýdaryldy.
– Osyǵan baılanysty dızaın-kod talaptary ǵımarattarǵa, jol jelisine, jarnama men syrtqy bezendirý elementterine qoldanylady. Qurylys, rekonstrýktsııalaý jáne abattandyrý jumystary belgilengen talaptarǵa sáıkes júzege asyrylady. Atalǵan máselelerdi úılestirý maqsatynda Sáýlet-qala qurylysy keńesin qurý josparlanyp otyr. Keńes sondaı-aq qalanyń jáne onyń mańyndaǵy aımaqta sáýlet-qala qurylysy men kórkemdik kelbeti boıynsha jobalardy qarastyratyn bolady. Bul biryńǵaı qala qurylysy saıasatyn iske asyrýǵa, eldi mekenderdiń ornyqty damýyn qamtamasyz etýge jáne zamanaýı sáýlettik kelbetin qalyptastyrýǵa múmkindik beredi, - dedi Ulttyq ekonomıka vıtse-mınıstri.
Sonymen birge, búgin Parlament palatalarynyń birlesken otyrysynda «Qazaqstan Halyq Keńesi týraly» konstıtýtsııalyq zań jobasy da birinshi oqylymda maquldandy.
