Astanada bazarlardy tekserý kezinde qandaı zań buzý derekteri anyqtaldy
ASTANA. KAZINFORM — Astana qalasy boıynsha Saýda jáne tutynýshylardyń quqyqtaryn qorǵaý departamenti elordadaǵy birqatar saýda bazarlarynda júrgizilgen jospardan tys tekserýlerdi aıaqtady. Tekseris Uljan», «Altaı», «Saryarqa», «Alash» jáne «Sharyn» bazarlaryn qamtydy.
Saýda jáne ıntegratsııa mınıstrliginiń habarlaýynsha, tekserý nátıjesinde Qazaqstan Respýblıkasynyń «Saýda qyzmetin retteý týraly» Zańynyń, Іshki saýda qaǵıdalarynyń jáne ulttyq standarttardyń talaptary saqtalmaǵany anyqtaldy. Bul zań buzýshylyqtar boıynsha bazar ıelerine eskertý berilip, olardy joıý jóninde oryndaýǵa mindetti nusqamalar tabystaldy. Belgilengen merzim aıaqtalǵannan keıin departament nusqamalardyń oryndalýyna baqylaý júrgizedi. Onyń qorytyndysy boıynsha qoldanystaǵy zańnamaǵa sáıkes tıisti protsestik sharalar qabyldanady.
Atalǵan tekserýler saýda bazarlaryn jańǵyrtýǵa memleket belgilegen ótpeli kezeńniń aıaqtalýyna baılanysty júrgizildi. Jańa talaptar kúshine engenge deıin bazar ıelerine saýda nysandaryn zańnama talaptaryna sáıkestendirý úshin birneshe jyl ýaqyt berilgen bolatyn.
— Jalǵa berýshi de, satýshy da eń aldymen satyp alýshy úshin jumys isteıtinin umytpaýymyz kerek. Sondyqtan tutynýshynyń jaılylyǵy týraly qazirden bastap baıyppen oılanatyn ýaqyt keldi. Tutynýshyǵa qolaıly ári jaıly jaǵdaı jasalǵan saıyn, bazarlardaǵy saýda-sattyqtyń da qarqyny arta túsedi, — dedi Astana boıynsha saýda jáne tutynýshylardyń quqyqtaryn qorǵaý departamentiniń basshysy Erkebulan Taǵashev.
2026 jyldyń qańtarynan bastap Qazaqstan Respýblıkasynyń «Saýda qyzmetin retteý týraly» Zańynyń 10-babynyń 2-2-tarmaǵynyń talaptary tolyq kólemde qoldanysqa engizildi. Zańǵa sáıkes, elordada, respýblıkalyq jáne oblystyq mańyzy bar, sondaı-aq halqy 100 myńnan asatyn qalalardaǵy ámbebap saýda bazarlary statsıonarlyq saýda obektilerinde jumys isteýge tıis. Ashyq úlgidegi beıstatsıonarlyq konstrýktsııalardy saýdanyń negizgi formaty retinde paıdalaný endi zań talaptaryna sáıkes kelmeıdi.
2025 jylǵy 31 jeltoqsanǵa deıin bazar ıelerine saýda nysandaryn jańǵyrtý jáne qaıta jaraqtandyrý jumystaryn aıaqtaýǵa múmkindik berildi. Osy jumystardy úılestirý maqsatynda saýda bazarlaryn jańǵyrtý jónindegi jol kartasy bekitildi.
Astana qalasy boıynsha bul jol kartasyna «Uljan», «Altaı», «Shanhaı (Kók bazar)», «Saryarqa», «Ortalyq bazar», «Alash» jáne «Sharyn» bazarlary engizildi.
Eske salaıyq, buǵan deıin Almatydaǵy kóterme bazarda myńnan astam zań buzý deregi anyqtalǵanyn habarlaǵanbyz.
