Astanada Saýd Arabııasynyń Qazaqstandaǵy elshiligi Koroldiktiń Ulttyq kúnine oraı resmı qabyldaý ótkizdi - FOTO
Saýd Arabııasy Koroldiginiń Qazaqstandaǵy Tótenshe jáne Ókiletti Elshisi Gýrm ben Saıd Al Malhan óz sózinde Saýd Arabııasy Koroldigi (SAK) qurylǵaly beri damý jolynda kóptegen irgeli qadamdar jasap, qazirgi tańda halqyna jáne onda turatyn azamattarǵa eń joǵary deńgeıde qyzmet kórsetetin elge aınalǵandyǵyn atap ótti.
«Saýd Arabııasy Koroldigi álemdegi eń kóp gýmanıtarlyq jáne damý jolynda kómek kórsetetin 10 iri memlekettiń biri bolyp tabylady. BUU-nyń statıstıkasyna sáıkes, ótken jyly 6-shy oryndy ıelendi. Sońǵy 40 jylda kórsetken kómeginiń jalpy kólemi 115 mıllıard dollardan asyp, álemniń 90-nan astam eline kómek kórsetti»,-dedi Elshi óz sózinde.
Ol sondaı-aq Saýd Arabııasy Koroldiginiń Koroli, Qos kıeniń saqshysy, Sálman ben Abdýlazız Ál Saýd jáne QR Prezıdenti Nursultan Nazarbaevtyń basshylyǵy aıasynda eki el arasynda ekijaqty dostastyq qarym-qatynastyń ornaǵandyǵyn eske saldy. Bul ystyq yqylas sońǵy jyldarda odan ári tereńdep keledi. 2014 jyly qarasha aıynda Er-Rııad qalasynda ótken Birikken qazaq-saýd komıssııasynyń 4-shi otyrysy sonyń bir jarqyn kórinisi ispettes. Eske sala ketsek, bul Komıssııaǵa qazaqstandyq taraptan QR Investıtsııa jáne damý mınıstri tóraǵalyq etken bolatyn. Ol joly SAK Saýda jáne óndiris mınıstri bastaǵan quramynda 135 adam bar úkimettik delegatsııa Qazaqstanǵa resmı saparmen keldi.
Endi SAK Saýda jáne óndiris mınıstriniń shaqyrýy boıynsha, QR Investıtsııa jáne damý mınıstriniń Saýd Arabııasyna sapary kútilýde.
Búgingi tańda eki el arasyndaǵy kóptegen salalarda kelisimsharttar men túsinistik memorandýmdarynyń jobalaryn talqylaý úderisteri júrip jatyr.
Osy arada erekshe atap óter jaıt, aǵymdaǵy jyly Qazaqstan qajylary Almaty áýejaıynan Mádına men Djıdda qalalaryna alǵash ret tikeleı reıspen sapar shekti.
«Bul ońdy shara ózara yntymaqtastyqtyń nátıjesinde júzege asty. Búgingi SAK Ulttyq kúnine qatysty is-sharalarymyzǵa qatysqandaryńyzǵa alǵysymdy bildiremin», - dedi sóziniń sońynda Saýd Arabııasy Koroldiginiń Qazaqstandaǵy Tótenshe jáne Ókiletti Elshisi Gýrm ben Saıd Al Malhan.