Astanada Saýd Arabııasy koroliniń jeke kórmesi ótedi
ASTANA. QazAqparat - 2017 jylǵy 18 mamyrda Qazaqstan Respýblıkasy Ulttyq mýzeıinde Saýd Arabııasynyń koroli Feısal ıbn Abdýl Azızdiń jeke kollektsııasynan «Ál Feısal: ádildik jáne batyldyq joly» atty kórme ashylady, dep habarlaıdy Ulttyq mýzeıdiń baspasóz qyzmeti.
Kórmede koroldiń jeke zattary, qasıetti mýshaftar, 1927 jyly korol Feısaldyń bastamasymen ashylǵan kısýa matasyn (qasıetti Qaǵbany oraıtyn mata) óndiretin tsehta jasalǵan alǵashqy kısýa jáne túrli sýyq qarýlar, qurmet tósbelgileri, fotosýretter men muraǵattyq qujattar nazarǵa usynylady.
Feısal ıbn Abdýl-Azız Al Saýd (1906-1975) - Saýdıtter áýletinen shyqqan Saýd Arabııasynyń úshinshi koroli (1964-1975), Saýd koroldiginiń negizin salýshy Abdýl-Azız ıbn Saýdtyń úshinshi uly.
«Ál Feısal basshylyq etken dáýir murasyn baǵalamaý múmkin emes. Korol júrgizgen aýqymdy reformalar qoǵamnyń barlyq qyrlaryna áser etip memleketti jańa deńgeıge kóterdi. Elde josparlaý júıesi bekitildi, búgingi kúnniń ózinde jańa zańnamalyq normalar daıyndaý kezinde súıenetin mańyzdy zańdar qabyldandy. Feısaldyń halyqaralyq deńgeıdegi bastamalary Koroldikti halyqaralyq saıası, ekonomıkalyq, mádenı yntymaqtastyqta belsendilik tanytatyn iri derjavalar qataryna qosty»,-delingen habarlamada.
Kórme saǵat 10.45-te bastalady jáne 2017 jyldyń 30 mamyryna deıin jalǵasady.
