Astanada Saraıshyq qalasyn saqtaý máselesi talqylanady

ASTANA. QazAqparat - Kelesi dúısenbi, sáýirdiń 3-i kúni elordada «Saraıshyq: uly qala tarıhy» taqyrybynda Halyqaralyq ǵylymı konferentsııany ótkizý josparlanyp otyr, dep habarlaıdy QazAqparat tilshisi QR Mádenıet jáne sport mınıstrliginiń baspasóz qyzmetine silteme jasap.

Ǵylymı májiliske 40-tan astam otandyq jáne shetel ǵalymdary qatysady. Barlyǵy ortaǵasyrlyq Saraıshyq qalashyǵyn saqtap qalý boıynsha sharalar men ǵylymı zertteýlerdiń qorytyndysyn talqyǵa salmaq. Konferentsııanyń negizgi maqsaty - qalashyqty qalpyna keltirý men buzylýdan saqtaý máselelerine joǵary bilikti sheteldik jáne otandyq ǵalymdardyń nazaryn aýdarý. Sebebi búgingi tańda tabıǵı-klımattyq jáne antropogendik faktorlardyń áserinen Saraıshyq qalashyǵynyń jaǵdaıy mınıstrliktiń, ákimdiktiń, qoǵam men ǵalymdardyń alańdaýshylyǵyn týǵyzýda.

«Ǵylymı konferentsııaǵa QR Mádenıet jáne sport mınıstri A.Muhamedıuly, QR Parlamentiniń depýtattary, tarıh ǵylymdarynyń doktorlary, belgili arheologtar Z.Samashev, K.Baıpaqov, J.Taımaǵambetov, B. Kómekov, fılosofııa ǵylymdarynyń doktory, professor, QR UǴA akademıgi Ǵ.Esim, A. Baqtygereeva, M. Qulkenov, Q.Jylqyshıev tárizdi qoǵam jáne mádenıet qaıratkerleri, jaqyn jáne alys shetel ǵalymdary, qoǵamdyq uıymdardyń, memlekettik mekemelerdiń ókilderi, joǵary oqý oryndarynyń stýdentteri jáne BAQ qatysady. Sonymen qatar, konferentsııa aıasynda Saraıshyq qalashyǵy tarıhyna arnalǵan kórme uıymdastyrylady. Kórmege ejelgi qalaǵa qatysty kóptegen qundy arheologııalyq buıymdar, kartınalar jáne taǵy basqa zattar qoıylady», - delingen resmı habarlamada.