Astanada sarapshylar Memlekettik sımvoldardy qoldaný máselesin talqylady
«Bizde memlekettik sımvoldardy tıisti deńgeıde qoldanbaýǵa qatysty ákimshilik jáne qylmystyq jaýapkershilik qarastyrylǵan. Ákimshilik quqyq buzýshylyqtar týraly kodekste memlekettik sımvoldardy, gımn mátinin tıisti deńgeıde qoldanbaýǵa qatysty normalar kórsetilgen, sonymen qatar qajet kezde memlekettik sımvolıkany qoldanbaýǵa da qatysty jaýapkershilik kózdelgen», - dedi B. Omarova «Qazaqstan Respýblıkasynyń Memlekettik sımvoldary. 25 jyl: tarıh pen qoldaný tájirıbesi» atty ǵylymı, praktıkalyq konferentsııada.
«Árıne, siz balkonǵa Qazaqstan týyn ile alasyz. Resmı jáne resmı emes qoldaný degen bar. Resmı emes degenimiz - Qazaqstan azamattarynyń óziniń patrıottyq sezimderin, Otanyna degen mahabbatyn tanytý kezinde memlekettik týdy qoldaný», - dep jaýap qaıyrdy ol tilshilerdiń memlekettik týdy balkonǵa ilýge qatysty qoıǵan saýalyna.
Botagóz Omarovanyń sózinshe, sımvoldardy resmı qoldanýdyń erejeleri bekitilgenimen, ókinishke oraı, resmı emes jaǵdaılarda memlekettik sımvoldardy qaı kezderi qoldanýǵa bolmaıtynyn naqty kórsetetin qaǵıdalar joq.
«Normalar men zańdardy zerttep shyǵyp, men mynadaı uıǵarym jasadym, memlekettik tý basqa da ǵımarattarǵa olardyń ıeleriniń kelisimimen ornatyla alady. Memlekettik sımvolıkanyń sýretterin basqa materıaldyq obektilerde qoldanýǵa bolady. Olardy jeıdelerde, kóılekterde jáne ózge de kıimderde basyp shyǵarýǵa quqylysyz. Sonymen qatar zańdy jáne jeke tulǵalar kópshilik sharalarda ózderiniń patrıottyq sezimderin jetkizý úshin memlekettik sımvolıkalardy qoldana alady. Oǵan tikeleı tyıym joq. Ulttyq standarttardyń talaptaryn buzyp, memlekettik týdy qoldanýǵa, memlekettik sımvoldardy qoǵamdyq birlestiktermen ózge de uıymdardyń geraldıkalyq belgilerine tańýǵa tyıym salynǵan. Memlekettik tý mazaq pen qorlaýdyń nysanyna aınalmaýy tıis. Ulttyq nyshandardy qorlaýǵa qatysty qylmystyq jaýapkershilik qarastyrylǵan. Qasaqana mazaq etý, týdy búldirý faktilerine tipti bas bostandyǵynan aıyrý jazasy kózdelgen. Negizinen bundaı qylyqtar narazylyq kezinde jáne buzaqylyq jasaý barysynda oryn alyp jatady», - dep túsindirdi B. Omarova.
Óz kezeginde, ІІM oqytý ortalyǵynyń jetekshisi, polıtsııa polkovnıgi Murat Esmaǵambetov QR Qylmystyq kodeksiniń 317 baby - Memlekettik sımvoldardy qorlaý boıynsha jaýapkershilik qoldanylatynyn atap ótti. Oǵan bir myńnan eki myń AEK-ke deıin aıyppul, sonymen qatar 1 jylǵa deıin bas bostandyǵynan aıyrý jazasy qarastyrylǵan.
