Astanada Sańyraýlar teatrynyń alǵashqy premerasy ótti
ASTANA. 8 maýsym. QazAqparat - Búgin Astanadaǵy Mahambet Ótemisuly atyndaǵy Oqýshylar saraıynda Sańyraýlar teatrynyń alǵashqy premerasy ótti. Jastardyń shyǵarmashylyq ujymy Gans Hrıstıan Andersenniń «Túımeqyz» («Dıýımovochka») ertegisi boıynsha spektakl qoıdy.
Shyny kerek, teatr jastarynyń estý qabileti tómen bolsa da, olardyń akterlik sheberlikteri kez kelgen adamdy beı-jaı qaldyrmaıdy. Olardyń sahnada ózin-ózi ustaýy, barlyq is-qımyldy naqyshyna salyp oryndaýy, ónerge degen qulshynysy, emotsııasy - bárin sózsiz-aq túsinýge bolatyndaı. Jastar árbir keıipkerdiń obrazyn ıshara belgiler arqyly somdady. Ony tamashalaǵan kórermen qaýym - zaǵıp jandardyń qýanyshynda shek bolmady. Olar da ónerdi túsinedi, sezedi.
Búgingi qoıylym jas rejısser Danııar Malǵajdarovtyń dıplomdyq jumysy eken. Biraq ol bul qoıylym esep emes, shyn júrekten shyqqan týyndy dep biledi. «Shyny kerek, bas kezinde qıyndaý boldy. Men sahnada ári-beri júrip, bul bastamadan bas tartsam ba dep te oıladym. Alaıda jastardyń kózindegi otty kórgen kezde, men odan da qatty jigerlendim. Olardyń sózsiz qýanyshy maǵan kúsh-qýat berdi», - deıdi D.Malǵajdarov.
Sańyraýlar teatrynyń búgingi premerasyna teatr óneriniń maıtalmandary da joǵary baǵa berip otyr. «Estý qabileti tómen bolyp týý bul taǵdyr taýqymeti ǵoı. Sondyqtan bundaı qoıylymdardy jaı otyryp kórý múmkin emes. Júregi, sanasy bar adam bir qýanyp, bir kúızelip otyrady. Endi, Alla taǵala bireýge bárin berse, ekinshisin kemsitip qoıady. Estý qabileti nashar jastar da oǵan kináli emes. Osyndaı balalardyń úmitin oıatyp, kózine qýanysh syılap, kópshiliktiń aldyna sahnaǵa shyǵý baqytyna bóleý úlken saýapty is dep bilemin», - deıdi Qalıbek Qýanyshbaev atyndaǵy Qazaq akademııalyq mýzykalyq drama teatrynyń dırektory-kórkemdik jetekshisi Erkin Jýasbek.
Jastardyń ata-analary da rejısserge myń alǵystaryn bildirip, bul bastamany ári qaraı jalǵastyrýdy ótindi.
