Astanada «Samuryq-Qazyna» UÁQ arqyly turǵyn úıdi jalǵa berý baǵdarlamasy júzege asyryla bastady
STANA. Sáýirdiń 7-si. QazAqparat /Gúlmıra Álıakparova/ - Astanada turǵyn úıdi jalǵa berý baǵdarlamasyn júzege asyrý bastaldy. Búgin qala ákimdiginde ótken brıfıngte «Samuryq-Qazyna» UÁQ jáne Jyljymaıtyn múlik qorynyń ókilderi baǵdarlamanyń erejelerimen egjeı-tegjeı tanystyrdy,
dep habarlaıdy QazAqparat.
Baǵdarlamanyń bastalýyna oraı elorda ákimi Imanǵalı Tasmaǵambetov pen «Samuryq-Qazyna» UÁQ Basqarma tóraǵasy Qaırat Kelimbetov yntymaqtastyq týraly kelisimge qol qoıdy. Astana qalasynyń ákimdigi kelisim aıasynda Jyljymaıtyn múlik qoryna (JMQ) baspanaǵa muqtajdardyń kezeginde turǵan áleýmettik álsiz top ókilderiniń tizimin usynatyn bolady. Ol azamattar jalǵa beriletin páterlerdi úlestirý kezinde basymdyqqa ıe bolmaq.
JMQ Basqarma tóraǵasy Ǵosman Ámrın málim etkendeı, kompanııa páterlerdi bıznes, ekonom jáne áleýmettik sanattar boıynsha - jaldaý, jaldaý arqyly satyp alý jáne qolma-qol satyp alý qaǵıdattary boıynsha úlestiretin bolady. Búgingi kúni «Aqjaıyq» jáne «Ál-Arqa» turǵyn úı keshenderiniń qurylysy aıaqtaldy, olar boıynsha azamattardan qujattardy qabyldaý aǵymdaǵy sáýir aıynyń 12-sinen bastalady. Jyl sońyna deıin jalǵa berý naryǵyna barlyǵy 1300 páter tapsyrylmaq. Jalǵa beriletin páterlerge tólem qabilettiligi joǵary Qazaqstan Respýblıkasynyń kez-kelgen azamaty úmittene alady. Jalǵa alýshy 5 jylǵa deıin JMQ-dan páterdi satyp alýǵa, satýǵa jáne basqa tulǵaǵa jalǵa berýge quqyǵy joq. Páterlerdi jalǵa berý merzimi - 12 jyl. Bul merzim ishinde kelisimde kórsetilgen baǵa ózgermeıdi jáne turaqty bolady. Sondaı-aq, páterdiń bir aılyq jaldyq baǵasynyń 4 eselengen mólsherdegi somasy baǵdarlamanyń operatory - «Qazaqstannyń turǵyn úı qurylys jınaq banki» AQ-da depozıtke salynýy tıis.
Áleýmettik sanattaǵy úıler baspanasy joq azamattarǵa ǵana beriletin bolsa, ekonom jáne bıznes sanattaǵy páterlerge turǵyn úı jaǵdaıyn jaqsartqysy keletin úıleri bar adamdar úmittene alady. Birinshi kezektegi basymdyq baspanasy joqtarǵa beriledi. Al bir úıge teń jaǵdaımen birneshe adam talasatyn bolsa, onda 2005 jyldan bastap Memlekettik turǵyn úı baǵdarlamalaryna qatysqandar ústemdikke ıe bolady.
Nysandardyń iske qosylý shamasyna qaraı qujattardy qabyldaý merzimi belgilenip otyrady jáne ol aldyn ala jarııalanady. Úmitker ótinimderdi qabyldaý bastalǵan kúni aldymen, operator Bankke baryp (Qajymuqan k-si, 12 «a»), óziniń tólem qabilettiligin anyqtaıdy. Banktiń bul qyzmeti úshin komıssııalyq tólem 14 myń teńgeni quraıdy (1 jyl úshin). Qujattar qabyldaý bastalǵannan 15 kúnnen keshiktirilmeı usynylýy tıis. Olardy qaraý jáne sheshim shyǵarý merzimi 38 kúnnen aspaıtyn bolady.
Sondaı-aq, qabyldanǵan qujattardy qaraý jáne úılerdi bólý kezinde ashyqtyqty qamtamasyz etý maqsatynda arnaıy turǵyn úı komıssııasy quryldy. Onyń quramyna «Nur Otan» HDP, JMQ, Astana ákimdigi, «Samuryq-Qazyna» UÁQ jáne «Atameken» odaǵy» Qazaqstan ulttyq ekonomıkalyq palatasynyń ókilderi endi.
Sonymen birge, «Samuryq-Qazyna» holdınginiń qurylymdary úshin kvota engizilmek jáne Qazaqstan Úkimetine úılerdi Erejeden tys úlestirý múmkindigi qarastyrylady.
Baǵdarlama Erejesiniń tolyq mátini sáýirdiń 10-y kúni «Kazahstanskaıa pravda» jáne «Egemen Qazaqstan» gazetterinde jáne JMQ-nyń www.kazproperty.kz saıtynda jarııalanady, sondaı-aq sáýirdiń 8-inen bastap barlyq suraqtar boıynsha aqparattyq (87172 634415) jáne call-ortalyqtar (87172 634364) jumys isteıdi. Azamattardy qabyldaýdy JMQ-nyń enshiles kompanııasy «FN menedjment» JShS (Orynbor k-si, 21/1, 2-shi keńse) júrgizedi.
