Astanada «Samuryq-Qazyna» arqyly jalǵa beriletin páterlerge 159 úmitker tirkeldi
ASTANA. Mamyrdyń 4-i. QazAqparat /Gúlmıra Álıakparova/ - Astanada «Samuryq-Qazyna» UÁQ arqyly jalǵa beriletin páterlerge úmitker retinde 159 azamat qujattaryn tapsyrdy,
dep habarlaıdy QazAqparat.
Eske sala keteıik, «Samuryq-Qazyna» UÁQ sáýirdiń ótken 12-si kúni qurylystary aıaqtalǵan «Aq Jaıyq» jáne «Ál-Arqa» turǵyn úı keshenderinde páterlerdi jalǵa berý qaǵıdaty boıynsha úlestirý úshin azamattardan qujattardy qabyldaýdy bastaǵan edi. Jalǵa beriletin baspanalardyń jalpy sany - 256 (140 jáne 96 sáıkesinshe).
«Samuryq-Qazyna» UÁQ Jyljymaıtyn múlik qorynyń basqarýshy kompanııasy - «JQ menedjment» JShS men «Qazaqstannyń Turǵyn úı qurylys jınaq banki» AQ qujattardyń qabyldanyp jatqan ekinshi jumys aptasynyń qorytyndysyn shyǵardy.
Sáýirdiń 8-inen bastap 23-ine deıin «JQ menedjment» JShS jalǵa berý jáne jalǵa berý arqyly jekeshelendirýge jatatyn baspanalardy úlestirý erejelerin túsindirýge qatysty 2 969 adamǵa keńester bergen.
Sonymen birge, qujattardy qabyldaý bastalǵan kúnnen beri «Qazaqstannyń Turǵyn úı qurylys jınaq bankine» arendalyq tólemniń somasyn eseptetý úshin, ıaǵnı úmitkerdiń tólem qabilettiligin anyqtaý úshin barlyǵy 1032 ótinish tapsyrylǵan.
Banktiń oń maquldaýyn alǵan azamattardyń ishinde Basqarýshy kompanııaǵa barlyǵy 159 áleýetti úmitker tirkelgen. Olardyń 136-sy - «Aq Jaıyq», 53-i - «Ál-Arqa» turǵyn úı keshenderindegi páterlerge.
