Astanada samokat mingenderge reıdtik tekseris kúsheıdi
ASTANA. KAZINFORM — Jazdyń bastalýymen elorda kóshelerinde elektrosamokat paıdalanýshylar sany aıtarlyqtaı artty. Alaıda kóptegen azamat jol qozǵalysy erejeleriniń talaptaryn elemeı, ózderine jáne aınalasyndaǵylarǵa qaýip tóndirip otyr.
Astana qalasy polıtsııa departamentiniń málimetinshe, jyl basynan beri tártip saqshylary elektrosamokat paıdalanýshylar tarapynan jasalǵan jol erejesin buzýdyń 1200-den astam deregin anyqtady.
Polıtsııa qyzmetkerleri qaýipsizdikti qamtamasyz etý jáne quqyqbuzýshylyqtardyń aldyn alý maqsatynda turaqty túrde reıdtik jáne profılaktıkalyq is-sharalar júrgizip keledi.
— Máselen, bir jaǵdaıda eki kámeletke tolmaǵan jasóspirim kólik kóp jolda bir elektrosamokatpen júrip, jol qozǵalysy erejelerin birneshe ret buzǵan. Osy derek boıynsha 16 jasqa tolǵan jasóspirimge qatysty ákimshilik hattama toltyryldy. Sondaı-aq kámeletke tolmaǵandardyń zańdy ókilderi olardy tárbıeleý jáne kútip-baǵý mindetterin tıisinshe oryndamaǵany úshin jaýapkershilikke tartyldy. Polıtsııa eske salady: bir samokatqa eki adam mingesýge, qozǵalys kezinde telefon men qulaqqap qoldanýǵa, jyldamdyqty asyrýǵa jáne qaýipti manevrler jasaýǵa tyıym salynady. Jaıaý júrginshiler ótkeli arqyly ótken kezde samokattan túsip, ony jaıaý alyp ótýi tıis, — delingen habarlamada.
Elektrosamokatpen júrýge velojolaqtar men velosıped jolaqtarynda ruqsat etiledi, al olar bolmaǵan jaǵdaıda — joldyń oń jaq shetimen júrýge bolady. Bul rette júrgizýshi 18 jastan asqan bolýy, kez kelgen sanattaǵy júrgizýshi kýáligi bolýy, qorǵanysh motoshlem kııýi jáne qarańǵy ýaqytta jaryq shaǵylystyratyn elementterdi qoldanýy tıis. Sonymen qatar elektrosamokat operatorlaryna tirkeý nómirlerin berý jáne esepke alý mindeti júktelgen.
Jalǵa beriletin samokattardy paıdalanýshylar olardy jıi ruqsat etilmegen oryndarǵa qaldyryp ketedi. Trotýarlarda, aıaldamalarda jáne jaıaý júrginshiler ótkelderinde tastalǵan mundaı kólik quraldary azamattarǵa kedergi keltiredi. Mundaı samokattar evakýatsııalanyp, kommýnaldyq aıyp turaǵyna jetkiziledi.
Astana qalasynyń Polıtsııa departamenti azamattardy zań talaptaryn qatań saqtaýǵa shaqyrady. Joldaǵy qaýipsizdik árbir jol qozǵalysyna qatysýshynyń jaýapkershiligine baılanysty.
Budan buryn Óskemende samokat júrgizýshileri jasaǵan quqyq buzýshylyqtar sany artyp kele jatqanyn jazdyq.
