Astanada salynyp bitpegen «Zere» TK úleskerlerine mıllıard teńge berildi
ASTANA. QazAqparat - Astana qalasy prokýratýrasynyń talap-aryzymen úleskerlerge qurylysy aıaqtalmaǵan «Zere» turǵyn-úı kesheniniń úleskerlerine tıisti qarajatty berý týraly sot sheshimi shyqty, dep habarlaıdy «QazAqparat» HAA tilshisi.
«Ekonomıkalyq soty «Zere-Samuryq» turǵyn-úı qurylys kooperatıviniń quramyndaǵy 130 úleskerdiń múddesine saı Astana qalasy prokýrorynyń talap aryzyn qanaǵattandyrdy. «Zere» turǵyn-úı kesheniniń jaýapsyz qurylys júrgizýshileri, atap aıtqanda «KazGazAstana» jáne «Altyn sapa 2011» JShS-nen 1 mıllıard teńgeden astam qarjy óndirildi. Qurylysy aıaqtalmaǵan «Zere» turǵyn-úı kesheni jer telimimen birge turǵyn-úı qurylys kooperatıvine berildi», - delingen habarlamada.
Qazirgi tańda qurylysty aıaqtaý úshin úleskerler jańa salýshylardy shaqyrýǵa múmkindik aldy.
Qurylysty aıaqtaý máseleleri boıynsha turǵyn-úı kesheni múshelerine Astana qalasynyń prokýratýrasy men ákimdigi quqyqtyq kómek kórsetpek.
Eske sala ketsek, osy jyldyń mamyr aıynda «KazGazAstana» men «Altyn sapa 2011» JShS-niń basshysy úleskerlerdiń qarajattaryn jymqyrǵan úshin 9 jyl bas bostandyǵynan aıyrylǵan bolatyn.
