Astanada salynatyn zooparkte janýarlardyń 49 túri ornalasady (FOTO)
ASTANA. QazAqparat - Astananyń sol jaǵalaýynda salynatyn haıýanattar baǵyna Soltústik Amerıka, Ońtústik Amerıka men Afrıkadan janýarlar jetkiziledi. Zooparktiń jalpy aýdany 50 gektardy quraıdy. Bul týraly «QazAqparat» agenttiniń resmı saýalyna jaýap bere otyryp, Astana qalasynyń qurylys basqarmasy habarlady.
«Qazir «Astana qalasynda haıýanattar baǵynyń qurylysy» jobasynyń tehnıkalyq-ekonomıkalyq negizdemesi ǵana ázirlengen. Jobany ázirleýshi «PPK» jobalaý-qurylys kompanııasy» JShS. Joba boıynsha, haıýanattar baǵy aýmaǵynyń jalpy aýdany 50 ga bolmaq. Qurylystyń jer telimi ıppodromnan ońtústik-batysqa qaraı, Astana qalasynyń sol jaǵalaýy bóliginde ornalasqan», - dep habarlady basqarma.
Jobanyń tehnıkalyq-ekonomıkalyq negizdemesine saı, qurylystyń esepteý quny 24,31 mlrd.teńgeni quraǵan. Ázirge, qarjylandyrý bólinbegen soń, jumystyń jobasy daıyn bolmaı otyr.
«Haıýanattar baǵyna janýarlardyń 49 túrin ornalastyrý, negizinen Soltústik Amerıka, Ońtústik Amerıka jáne Afrıka sekildi aımaqtardan ákelý josparlanýda. Haıýanattar baǵynyń aýmaǵyna ákimshilik korpýs, qyzmettik ǵımarat, sharýashylyq aýlasy, oranjereıa, janýarlarǵa arnalǵan jabyq pavılondar, qoımalar, sorǵy stantsııasy jáne ózge de nysandar ornalasatyn bolady. Qyzmetkerler quramynyń sany 287 adamdy quramaq»,-deıdi basqarma agenttiktiń saýalyna jaýap bere otyryp.
