Astanada salynatyn botanıkalyq baq jylyna mıllıonnan astam qonaqty qabyldaı alady
ASTANA. QazAqparat - 2013-2017 jyldar aralyǵyna qurylysy josparlanǵan Astana Botanıkalyq baǵy jylyna 1 mln 250 myń adamdy qabyldaı alady. Bul týraly «QazAqparat» tilshisiniń resmı saýalyna jaýap bere otyryp, elorda ákimdigine qarasty kommýnaldyq sharýashylyq basqarmasy habarlady.
«Astana qalasynda salynatyn Botanıkalyq baq qurylysyna tapsyrys bergen «Astana qalasynyń Kommýnaldyq sharýashylyq basqarmasy», memlekettik mekemesi. Jalpy, baqtyń qurylys jobasy 3 kezeńge bólingen. 2013 jyly birinshi kezeńniń qurylysy bastaldy. Bas merdiger - «Astana» kógaldandyrý qurylysy» AQ. Osy jyldyń qyrkúıeginde 2-kezeńniń qurylys saraptamalyq qorytyndysy daıyndalyp, qazir merdiger uıymdy anyqtaý úshin memlekettik satyp alý konkýrsyn jarııalaý jumystary júrgizilip jatyr. Jyl sońyna deıin 3-kezeńniń saraptamalyq qorytyndysy daıyn bolady», - dep habarlaǵan ákimdiktiń baspasóz qyzmeti.
Jalpy, qarjy ýaqytynda bólinse, botanıkalyq baqtyń qurylysy 2013-2017 jyldar aralyǵynda aıaqtalady dep josparlanǵan.
Saıabaq ornalasatyn aýmaqty atar bolsaq, botanıkalyq baq - elordanyń Esil aýdanynda, Esil ózeniniń sol jaǵalaýynda, Qabanbaı batyr dańǵyly-Túrkistan-24 jáne 26-shy kósheler aýmaǵynda ornalasatyn bolady. Botanıkalyq baq jylyna 1 mln 250 myń qonaqty qabyldaı alady. «Botanıkalyq baq salynǵan soń 203 adamdy turaqty jumyspen qamtıdy, kúnine 8 saǵat jumys isteıdi» , -dep habarlanǵan ákimdiktiń jaýabynda.
