Astanada salonyna sý kirip ketken avtobýs júrgizýshisi jumystan shettetildi
ASTANA. QazAqparat - Astanada salonyna sý kirip ketken avtobýstyń júrgizýshisi jumystan shettetildi. Bul týraly OKQ-da ótken baspasóz máslıhatynan keıin tilshilerdiń suraǵyna jaýap bergen Astana qalasy ákiminiń orynbasary Qosman Aıtmuhambetov málim etti, dep habarlaıdy QazAqparat tilshisi.
«Oǵan (júrgizýshige -avt.) ol jaqqa barmaý kerektigi eskertilgen. Onyń ústine ol jaǵdaıdy jaqsy bilgen. Adamdarmen kele jatqanyn eskerýi kerek edi. Biz kósheni jaýyp tastap, patrýldik kólikti, qorshaýdy qoıdyq. Almaty aýdany ákimdiginiń qyzmetkerleri oǵan keri burylýdy suraǵan edi. Biraq, ol tyńdamaı ary qaraı júre bergen. Ol aınalyp ótýi kerek edi. Momyshuly kóshesine ol Toqpanovty aınalyp óte alar edi. Onyń endigi jumysta qalý-qalmaýyn «Astana LRT» basshylyǵy sheshedi. Ol jerde basqa júrgizýshiler aınalyp ótken. Al atalmysh avtobýstyń júrgizýshisi olaı etpegen», - dedi Qosman Aıtmuhambetov.
Eske sala ketsek, buǵan deıin áleýmettik jelide Astana kóshesimen júrip kele jatqan avtobýstyń salonyn tolyǵymen sý alyp ketkeni jóninde vıdeo taraǵan edi. Keıin «Astana LRT» kompanııasy elordada nóser kezinde salonyna sý kirip ketken avtobýstyń vıdeosyna qatysty túsinik bergen bolatyn.
