Astanada salmaǵy 5,4 keli qyz dúnıege keldi
ASTANA. QazAqparat - Elordalyq № 3 perınataldyq ortalyqta salmaǵy 5 400 gramm qyz bala dúnıege keldi. Dárigerlerdiń aıtýynsha, ol Astanada sońǵy 20 jylda osyndaı aýyr salmaqta týǵan úshinshi qyz bala, dep habarlaıdy elorda ákimdiginiń medıa ortalyǵy.
«Náreste 13 jeltoqsanda dúnıege keldi, onyń týǵandaǵy salmaǵy 5 400 gramm boldy. Bosaný esh qıyndyqsyz ótken. Bosanǵannan keıingi kezeń de qalypty boldy. Sábı men onyń anasynyń jaǵdaıy qalypty kúıinde úıine shyǵaryldy», - dedi medıa ortalyqtyń tilshisine bergen suhbatynda № 3 perınataldyq ortalyqtyń bosaný bóliminiń meńgerýshisi Elmıra Álimjan.
Ata-anasy eki uldan soń týǵan alyp qyzdyń esimin Jannur dep qoıypty.
Astana qalasynyń Densaýlyq saqtaý basqarmasy atap ótkendeı, bas qalada salmaǵy 5 584 gramm bolǵan alǵashqy alyp qyz 2003 jyly № 2 perınataldyq ortalyqta týǵan. Al 2014 jyly dúnıege kelgen ekinshi alyp qyzdyń salmaǵy 5 750 gramm boldy. Sondaı-aq, osy jyly elordadaǵy eń aýyr salmaqtaǵy ul bala dúnıege keldi. Onyń týǵandaǵy salmaǵy 5,5 kg kórsetti.
