Astanada salqyndatqysh qurylǵylarmen jabdyqtalǵan avtobýstardyń qatary artady
ASTANA. QazAqparat - Búgingi tańda Astanadaǵy qoǵamdyq kólikterdiń úshten bir bóligi ǵana aýany salqyndatatyn qurylǵylarmen jabdyqtalǵan, dep habarlaıdy Elorda ákimdiginiń medıa ortalyǵy .
«Sońǵy kezderi salqyndatqyshtardyń joqtyǵynan jolaýshylar tarapynan avtobýs salondary tym qapyryq degen aryz-shaǵymdar jıiledi», - deıdi «Astana LRT» jolaýshylar kóligi bóliminiń jetekshisi Beıbit Esjanov.
«Búgingi tańda Astanadaǵy jolaýshylar kóliginiń 35% ǵana salqyndatqysh qurylǵylarmen jabdyqtalǵan. Alaıda jyl aıaǵyna deıin bul kórsetkish ulǵaıady: 250 eskirgen avtobýs aýystyrylady. Biz olardy Eýro 6 sanaty boıynsha barlyq álemdik standarttarǵa saı keletin jańalaryna aıyrbastaımyz. Sáıkesinshe, olar salqyndatqysh júıelerimen jabdyqtalatyn bolady», - dedi B.Esjanov.
Onyń aıtýynsha, salqyndatqyshy bar qalalyq avtobýstardyń barlyǵynda qurylǵy jumys istep tur.
«Barlyq kólikter jelige shyqpas buryn tekseriledi, salqyndatqysh qurylǵysy istemeıtin birde-bir avtobýs joq. Kúnde tańerteń mehanık avtobýstardy qadaǵalaıdy», - dedi B.Esjanov.
Sondaı-aq, ol aýa temperatýrasy +15 gradýsty kórsetkende jolaýshylar júrgizýshiden salqyndatqyshty qosýdy talap ete alatynyn eske saldy.
«Astana LRT» kompanııasy daý, janjaldar oryn alǵan jaǵdaıda 8 (7172) 574-777 telefondary boıynsha habarlaý qajettigin aıtady. Operatorlar aryz-shaǵymdardy birden qabyldap, tikeleı júrgizýshilermen baılanysqa shyǵady.
«Árbir oqıǵany jiti tekseremiz. Eger júrgizýshi salqyndatqyshty óz betimen sóndirip, jolaýshylardyń ótinishine qulaq aspasa onda qyzmetkerge tártiptik jaza qoldanylady» - dedi B.Esjanov.
Osyǵan deıin habarlanǵandaı, sınoptıkterdiń boljamy boıynsha maýsym aıynyń aıaǵynda Astanada aptap ystyq bolady. Osy kúnderi 39 gradýsqa deıin ystyq kútilýde.
