Astanada salynyp jatqan LRT stantsııasy mańynda órt shyqty
ASTANA. KAZINFORM — Astanada salynyp jatqan LRT stantsııasy mańyndaǵy qoǵamdyq kólik aıaldamasy pavılonynda órt shyqty. Zardap shekkender joq, órttiń shyǵý sebebi anyqtalyp jatyr.
Qalalyq Tótenshe jaǵdaılar departamentiniń málimetinshe, Astana qalasynyń 112 pýltine Saraıshyq aýdanyndaǵy Nurmaǵambetov kóshesinde ornalasqan qoǵamdyq kólik aıaldamasynan tútin shyqqany týraly habarlama tústi.
Oqıǵa ornyna jedel jetken qutqarýshylar salynyp jatqan nysan aýmaǵyndaǵy aıaldama pavılonynyń jertólesinde tútin bolǵanyn anyqtady. Elektr qalqanyndaǵy kabelder men qurylys qoqysy shamamen 10 sharshy metr aýmaqta janǵan.
Órt sóndirýshiler jalyndy qysqa ýaqyt ishinde sóndirip, onyń kórshi bólmelerge taralýyna jol bermedi.
Budan buryn SQO-da 70 jyl buryn salynyp, namazhana retinde qoldanylǵan ǵımarat órtengenin jazdyq.