Astanada salynyp jatqan 4 stýdentter úıiniń biri bıyl paıdalanýǵa beriledi
ASTANA. KAZINFORM - Jańa oqý jylynda Eýrazııa ulttyq ýnıversıteti stýdentterdi jataqhanamen tolyqtaı qamtamasyz etýdi josparlap otyr.
QR Ǵylym jáne joǵary bilim mınıstrligi baspasóz qyzmetiniń habarlaýynsha, jańadan salynyp jatqan 4 ctýdenttik úı qurylysyna jeke ınvestıtsııa tartylǵan jáne sonyń biri bıyl paıdalanýǵa berilmek.
QR Ǵylym jáne joǵary bilim mınıstri Saıasat Nurbek, Astana qalasynyń ákimi Jeńis Qasymbek, «L.N.Gýmılev atyndaǵy Eýrazııa ulttyq ýnıversıteti» KeAQ Basqarma tóraǵasy-rektor Erlan Sydyqov bastaǵan joǵary oqý ornynyń basshylyǵy Jumabaev kóshesi men Kenen Ázirbaev kósheleriniń boıyndaǵy jańadan salynyp jatqan Stýdenttik úılerdiń qurylys jumysymen tanysty.
Sapar aıasynda jańa oqý jylyna daıyndyqty kózbe-kóz kórý maqsatynda qurylys jumystarynyń sapasy tekserilip, merdiger kompanııalarmen kezdesý ótkizildi.
