Astanada salynǵan «Keleshek mektepter» sany rekordty kórsetkishke jetti
ASTANA. KAZINFORM – Astana qalasynda 2024-2025 jyldary eki aýysymda oqytýǵa arnalǵan jalpy syıymdylyǵy 84 800 oqýshy ornyn quraıtyn 23 mekteptiń qurylysy aıaqtaldy, dep habarlaıdy elorda ákimdiginiń resmı saıty.
2024 jyly eki aýysymda 56 800 oqýshyǵa arnalǵan 16 zamanaýı jaıly mekteptiń qurylysy tolyq aıaqtalyp, paıdalanýǵa berildi. Bul óz kezeginde qaladaǵy 6 mektepte úsh aýysymdy oqytý máselesin tolyq sheshýge, sondaı-aq 9 bilim berý uıymyndaǵy oqýshy tyǵyzdyǵyn aıtarlyqtaı azaıtýǵa múmkindik berdi.
Qazirgi tańda atalǵan mektepterdiń barlyǵynda oqý úderisi shtattyq rejımde júrgizilýde.
Bıyl eki aýysymda 28 000 oqýshy ornyn qamtıtyn taǵy 7 mektep paıdalanýǵa berildi.
Osynyń arqasynda 2 mekteptegi úsh aýysymdy oqytý tolyq joıylyp, 7 mekteptegi oqýshy tyǵyzdyǵy tómendeıtin bolady.
Salynǵan jáne salynyp jatqan mektepterdiń basym bóligi halyq sany qarqyndy ósip kele jatqan Esil jáne Nura aýdandarynda ornalasqan. Bul sheshim jańa turǵyn úı keshenderinde turatyn balalardy bilim berý uıymdarymen ýaqytyly qamtýǵa múmkindik beredi.
«Keleshek mektep» ulttyq jobasy elordadaǵy bilim berý ınfraqurylymyn júıeli túrde jańǵyrtyp, oqýshylarǵa qolaıly, qaýipsiz ári sapaly bilim alý ortasyn qalyptastyrýǵa baǵyttalǵan. Joba nátıjesinde Astana qalasynda úsh aýysymdy oqytý máselesi kezeń-kezeńimen sheshilip, zamanaýı mektepter sany arta túsýde.
Aıta keteıik, Astanada qysqy sport túrlerine arnalǵan biryńǵaı mektep qurylady.