Astanada sal aýrýyna shaldyqqan taǵdyrdy baıandaıtyn fılmniń tusaýy kesildi
ASTANA. QazAqparat - Elordadaǵy Saryarka kınoteatrynda «Qyz ben teńiz» atty áleýemettik kórkem fılmniń tusaýkeseri ótti, dep habarlaıdy QazAqparat tilshisi.
Fılmde BTsP-men (balalardyń tselebraldy paralıchi) aýyratyn Ásel esimdi boıjetkenniń taǵdyry baıandalady. Sıýjet boıynsha Áseldiń armany ómirden óz mahabbatyn jolyqtyryp, soǵan turmysqa shyǵý. Ýaqyt óte kele boıjetken Tahır esimdi jigitti kezdestirip, ómiri ózgeredi.
«Bul fılm múmkindigi shekteýli jandardyń taǵdyryn baıandaıtyn «Bezgranıchnye vozmojnostı» atty dıalogııanyń ekinshi bólimi. «Byt ılı ne byt» atty birinshi bóliminde sal aýrýymen aýyratyn jas jigittiń taǵdyry beınelengen. Al ekinshi bólimde Ásel esimdi boıjetkenniń taǵdyry baıandalady. Basty róldegi keıipkerdiń ómiri arqyly, adam aldyna maqsat qoısa, qandaı qıynshylyqtarǵa qaramastan armanyna qol jetkize alatynyn kórsetkimiz keldi. Sol sııaqty Ásel taǵdyrdyń bergen synyna qaramastan, ómir súrýge degen qushtarlyǵy bir sát saıabyrsyǵan emes, kerisinshe ol kóp dúnıeni armandap, óz maqsatyna qol jetkize bildi», - deıdi fılm rejısseri ári prodıýseri Ázızjan Zaırov.
Kınotýyndynyń aıtyp óter ereksheligi, basty róldi somdaıtyn keıipkerler kásibı ártister emes. Odan bólek, róldi somdaýshylardyń arasynda Almatydaǵy «ARDI» ońaltý ortalyǵynyń oqýshylary da bar.
«Múmkindigi shekteýli jandar týraly baıandaıtyn bul fılm kórermenge oı salatyn, óte kúrdeli týyndy. Ókinishke qaraı, búginde biz qoǵamdaǵy múmkindigi shekteýli jandardyń ómiri jaıly, olardyń aınalysatyn isteri, qyzyǵýshylyqtary, sondaı-aq alǵa qoıǵan maqsattary men arman-tilekteri jaıly bile bermeımiz. Statıstıkaǵa súıensek, Qazaqstanda 600 myńnan astam múmkindigi shekteýli adam turyp jatyr eken, bul jalpy halyq sanynyń 3,5 % quraıdy. Osy turǵyda múgedektigi bar jandarǵa jaǵdaı jasaý, olarǵa qoljetimdi orta qurý men qoǵamnan tys qalmaýyna jiti kóńil bólý, bizdiń basty maqsatymyzdyń biri», - dedi QR Mádenıet jáne sport mınıstri Arystanbek Muhamedıuly.
QR Mádenıet jáne sport mınıstrliginiń tapsyrysymen «Qazaqfılm» kınostýdııasy túsirgen «Qyz ben teńiz» fılminiń rejısseri Muhamed Mamyrbekov pen Ázızjan Zaırov.
Basty rólderde Dınara Sháripova, Tahır Omarov, Qanaǵat Tasqaraev, Gúlbahram Baıbosynova, Saýran Qasteev, Almat Ádilbaev jáne basqalar.
